“Në Stamboll, ku pata kënaqësinë të takohesha me homologun Ziya Selçuk, vlerësuam bashkërisht ecurinë e deritanishme të marrëdhënieve tona dypalëshe”, është shprehur në lidhje me takimin ministrja Kushi
Në kuadër të vizitës zyrtare të delegacionit shqiptar në Turqi të kryesuar nga kryeministri Edi Rama, ministrja e Arsimit, Sportit dhe Rinisë, Evis Kushi është takuar në Stamboll me homologun e saj turk, Ziya Selçuk, transmeton Anadolu Agency(AA).
Në njoftimin e Ministrisë së Arsimit, Sportit dhe Rinisë të Shqipërisë, thuhet se gjatë takimit është vlerësuar ecuria e deritanishme e marrëdhënieve dypalëshe.
“Në Stamboll, ku pata kënaqësinë të takohesha me homologun Ziya Selçuk, ministër i Arsimit Kombëtar i Republikës së Turqisë, vlerësuam bashkërisht ecurinë e deritanishme të marrëdhënieve tona dypalëshe”, është shprehur në lidhje me takimin ministrja Kushi.
Gjatë takimit, Kushi dhe Selçuk kanë diskutuar edhe mbi pikat e zbatimit të marrëveshjes së nënshkruar në fillim të këtij viti mes dy vendeve.
Sipas ministres Kushi, mes dy palëve është shprehur vullneti i përbashkët për thellimin e mëtejshëm të bashkëpunimit mes Shqipërisë e Turqisë në fushën e arsimit.
Kujtojmë se gjatë vizitës së delegacionit nga Shqipëria, Presidenti i Turqisë, Recep Tayyip Erdoğan, priti në një takim edhe Kryeministrin Rama, ndërkohë delegacioni shqiptarë realizoi takime edhe me zyrtarë të tjerë turq.
