Kancelari gjerman Friedrich Merz deklaroi se vendi i tij ka dalë nga recesioni trevjeçar dhe se ekonomia ka hyrë sërish në një periudhë të fuqishme rritjeje.
Kontinenti evropian është përballur vitet e fundit me probleme të shumta ekonomike.
Rritja e çmimeve të energjisë dhe lufta ndërmjet Ukrainës dhe Rusisë kanë ndikuar thellësisht në të gjitha vendet evropiane.
Gjermania ishte ndër vendet më të prekura nga lufta dhe rritja e çmimeve të energjisë.
Kancelari gjerman Friedrich Merz mori pjesë në mbledhjen e kabinetit qeveritar, të mbajtur në Neuhardenberg.
Pas mbledhjes, Merz doli para mediave dhe foli për gjendjen e ekonomisë gjermane.
“Pas tri vitesh stagnimi, po shënojmë sërish rritje”
Duke theksuar se treguesit kryesorë ekonomikë e mbështesin këtë optimizëm, Merz deklaroi:
“Gjatë gushtit, indeksi i klimës së biznesit shënoi një rritje çuditërisht të madhe. Në tremujorin e tretë po regjistrojmë tashmë rritje të fuqishme dhe deri në fund të vitit recesioni do të mbetet plotësisht pas nesh. Pavarësisht luftës në Gjirin Persik, konfliktit në Ukrainë dhe luftërave tregtare globale, pas tri vitesh stagnimi po shënojmë sërish rritje.”
Merz bëri të ditur se parashikimet ekonomike për vitin e ardhshëm janë rishikuar në rritje, duke shtuar se Prodhimi i Brendshëm Bruto mund të rritet të paktën një për qind vitin e ardhshëm.
Reforma e pensioneve
Në fjalimin e tij, Merz foli edhe për reformën e pensioneve, e cila do të zbatohet në dy faza gjatë vjeshtës. Ai theksoi se në një shoqëri me popullsi në plakje duhet të ndalet tendenca e daljes së parakohshme në pension.
Merz deklaroi se, në përputhje me marrëveshjen e arritur me partnerët e koalicionit, synojnë ta heqin plotësisht mundësinë e pensionimit të parakohshëm në moshën 63-vjeçare.
Duke shprehur habinë për kritikat e disa kryeministrave të landeve, përfshirë Saksoninë-Anhalt, Turinginë dhe Saksoninë, Merz tha se rastet e personave të dëmtuar dhe rrethanat e veçanta në landet lindore dhe perëndimore do të shqyrtohen me kujdes. Ai shtoi se do t’i bindë drejtuesit e landeve për drejtësinë e kësaj qasjeje.
Industria gjermane
Kancelari Merz foli gjithashtu për çekuilibrat në tregtinë globale, duke pranuar se industria gjermane po kërkon një qëndrim më të ashpër përballë konkurrencës së pandershme në tregjet botërore.
Ai bëri të ditur se qeveria gjermane do ta përfundojë përcaktimin e qëndrimit konkret dhe të qartë ndaj Kinës përpara samitit të liderëve të Bashkimit Evropian, që do të mbahet në tetor.
Merz kujtoi gjithashtu se Komisioni Evropian është ngarkuar me përgatitjen e masave të reja për mbrojtjen tregtare, me qëllim parandalimin e dobësimit të fuqisë ekonomike të Bashkimit Evropian.
Ndryshimet klimatike dhe programet e mbrojtjes nga temperaturat e larta
Duke folur për valët ekstreme të të nxehtit gjatë verës, kancelari Merz deklaroi se ndryshimet klimatike janë një realitet i pakthyeshëm dhe njoftoi se qeveria federale do të vendosë në zbatim programe të reja për mbrojtjen nga nxehtësia dhe temperaturat e larta.
Ai theksoi se shteti nuk mund t’i zgjidhë i vetëm të gjitha problemet, duke nënvizuar rëndësinë e solidaritetit shoqëror dhe duke u bërë thirrje qytetarëve në çdo lagje që të kujdesen për njëri-tjetrin.
“E mbështesim vizionin ‘Prodhuar në Gjermani’”
Ministri i Financave, Lars Klingbeil, i cili gjithashtu foli në mbledhje, deklaroi se synojnë ta rikthejnë Gjermaninë në pozitën e liderit global teknologjik dhe ekonomik.
“Për të ardhmen e Gjermanisë nuk duhet të vendoset në Pekin apo Uashington. Ne e mbështesim vizionin ‘Prodhuar në Gjermani’ në fushën e inteligjencës artificiale dhe prodhimit të çipave”, tha Klingbeil.
Fondi prej 500 miliardë eurosh
Duke iu referuar fondit të posaçëm prej 500 miliardë eurosh të krijuar nga qeveria, Klingbeil deklaroi se falë këtyre investimeve strategjike u është dhënë fund politikave shtrënguese që dëmtonin të ardhmen.
Ai argumentoi se Gjermania nuk do të mund të dilte nga recesioni pa huamarrjen dhe investimet aktuale.
Çfarë kishte ndodhur?
Kancelari Merz, i cili në sondazhet e opinionit publik renditet pas partisë së ekstremit të djathtë Alternativa për Gjermaninë (AfD) dhe norma personale e mbështetjes së të cilit ka rënë në rreth 30 për qind, ishte prej kohësh nën presion të madh për të ndërmarrë reforma që do të mundësonin rimëkëmbjen e ekonomisë më të madhe të Evropës.
Ekonomia gjermane shënoi rritje prej 0,3 për qind në tremujorin e dytë të këtij viti krahasuar me tremujorin paraprak, pavarësisht ndikimeve negative të luftës në Lindjen e Mesme.
