Diplomati rus Ilija Serov, i dëbuar nga Maqedonia e Veriut dhe Antona Sokolov, e dëbuar nga Kroacia, janë të akredituar në misionin diplomatik rus në Bosnje dhe Hercegovinë, zbuloi Detektor.ba.
Ilija Serov ka punuar në Ambasadën Ruse në Maqedoninë e Veriut si atashe mediatik i Ambasadës Ruse në Maqedoninë e Veriut.
Në deklaratën e Ministrisë së Punëve të Jashtme të Maqedonisë së Veriut nga 15 prilli, saktësohej se diplomatët rusë janë dëbuar në bazë të informacioneve se kanë kryer veprimtari në kundërshtim me Konventën e Vjenës për Marrëdhënie Diplomatike. Deklarata nuk përmend emrat e diplomatëve, por postimet e një grupi motorrikësh rus zbuluan identitetin e të paktën njërit prej tyre.
Diplomatëve rusë iu dhanë pesë ditë afat për t’u larguar nga Maqedonia e Veriut.
Një vit pas dëbimit të tij nga Shkupi, në maj të këtij viti, Serov u paraqit në koncertin e Filarmonisë së Sarajevës në sallën e qytetit me rastin e Ditës së Fitores mbi Fashizmin, ku ishin të pranishëm përfaqësues të bashkësisë ndërkombëtare dhe autoriteteve vendore. Në atë kohë ai ishte tashmë në listën zyrtare diplomatike në Bosnje dhe Hercegovinë.
Një nga diplomatët që ndodhet tani në BiH, Anton Sokolov, u dëbua nga Kroacia. Siç konfirmohet për Detektor nga një burim diplomatik evropian dhe një burim sigurie në Bosnje dhe Hercegovinë, Sokolov ishte në mesin e 18 diplomatëve të dëbuar nga Kroacia më 11 prill 2022.
Emri i tij është në mesin e zyrtarëve rusë në listën diplomatike të Kroacisë nga prilli 2022. Në atë kohë ai mbante postin e sekretarit të dytë. Por emri i tij nuk është në listën e publikuar një vit më vonë.
Emri Anton Sokolov, siç shihet në të dhënat publike, është publikuar në listën diplomatike të Ministrisë së Punëve të Jashtme të Bosnje-Hercegovinës nga maji i vitit 2023, ku thuhet se është emëruar në detyrën e sekretarit të parë të Ambasadës së Federata Ruse. Ky është mandati i tij i dytë në BiH.
Siç thuhet në raportin vjetor të shërbimit inteligjent kroat, një nga arsyet e dëbimit të diplomatëve rusë ishte puna e fshehtë dhe e paligjshme e inteligjencës në Kroaci. Një numër vendesh të Bashkimit Evropian dëbuan dhjetëra diplomatë rusë të padëshiruar pas fillimit të pushtimit rus të Ukrainës në shkurt 2022. Ambasadat ruse duhej të reduktonin misionet e tyre ose të zëvendësonin diplomatët e dëbuar me të rinj.
Në Bosnje dhe Hercegovinë, misioni rus po rritet. Së shpejti pritet hapja e konsullatës në Banja Luka dhe në listën e diplomatëve rusë në BeH tashmë një është i regjistruar si punonjës i konsullatës, e cila ende nuk është hapur zyrtarisht. Ende nuk është bërë e ditur se ku do të jetë konsullata. Në të njëjtën kohë, në Banja Luka po ndërtohet një tempull rus, një nga më të mëdhenjtë në Ballkan.
Pas dëbimit nga Kroacia, në korrik të këtij viti, Sokolov është pritur nga drejtori i Shërbimit për Çështje me të Huaj. Sipas lajmeve në faqen e Shërbimit, drejtori Žarko Laketa e njohu Sokolovin dhe një punonjës tjetër të Ambasadës me sfidat e punës me emigrantët, si dhe organizimin, projektet dhe rezultatet e Shërbimit. Në raport thuhet se Sokolov ka falënderuar Laketën për shkëmbimin e informacioneve që ka marrë prej tij dhe ka theksuar rëndësinë e “ruajtjes së mëtejshme të lidhjeve dhe marrëdhënieve të vendosura profesionale ndërmjet Shërbimit dhe Ambasadës”, shkruan Detektor.ba.
