“Shumë njerëz thonin se kam gabuar që erdha në Manchester City, por jam në vendin e përsosur. Synimi im është të fitoj Kampionatin Evropian ose Botëror me Norvegjinë”, tha Haaland.
Kur isha i vogël, si shumë të tjerë, shikoja futboll dhe shikoja veçanërisht kur lojtarët festonin dhe mendoja – do të doja të isha unë. Dhe në njëfarë mënyre ishte e natyrshme që unë të bëhesha sulmues, tha Erling Haaland, lojtari i Manchester City-t dhe kombëtares së Norvegjisë, i cili mbrëmë u shpall lojtari i vitit për sezonin e kaluar nga Federata Evropiane e Futbollit (UEFA) në Monte Carlo.
“Në atë kohë ushtroja me miqtë e mi se si të festoja kur të bëhesha lojtar. Provova festime të ndryshme të golave”, tha Haaland në një konferencë ekskluzive për media në të cilën kishin qasje vetëm gazetarët e jurisë së UEFA-s për futbollistin më të mirë në Evropë.
I pyetur nëse fryt i suksesit të tij është talenti, ai u përgjigj: “Vështirë se është talenti. Nuk e di nëse kam lindur me talent. Në fakt, nuk mendoj se kam qenë shumë i talentuar. Kam punuar shumë fort, kështu që erdhi deri të një mirëkuptim i natyrshëm i lojës dhe gjithçka tjetër që shkon me të. E dua këtë ndjesi. Prandaj unë bëj atë që bëj”.
Ai po ashtu theksoi se sezoni i kaluar ishte më i miri në karrierën e tij, sepse me Manchester City-n e fitoi Ligën e Kampionëve UEFA, por edhe u bë kampion i Anglisë.
“Po jetoj një ëndërr. Kam arritur sukses të madh me shokët e mi sezonin e kaluar. Megjithatë, e gjithë kjo më jep një motivim të madh për të vazhduar me të njëjtin ritëm edhe në sezonet në vijim”, tha Haaland.
Rrjedhimisht edhe çmimi i UEFA-s për trajnerin më të mirë të vitit shkoi për City-n, pasi menaxheri më i mirë i sezonit të kaluar u shpall trajneri i City-t, Josep Pep Guardiola.
“Pep është një trajner i shkëlqyer, por edhe kërkon shumë. Të gjithë e dinë këtë dhe të gjithë mund ta shohin vetë”, tha Haaland, kurse për atë që ishte më e vështira në rrugën drejt suksesit, ai thotë:
“Kur erdha në Manchester City nuk ishte e lehtë për mua, sepse është një klub që nuk është mësuar të luajë me një sulmues klasik dhe për mua ishte një sfidë edhe më e madhe për të treguar se ata mund të luajnë edhe me sulmues. Shumë njerëz më thanë se zgjodha klubin e gabuar, se kisha gabuar që shkova në City. Është normale, njerëzit gjithmonë do të komentojnë. Detyra ime është t’u dëshmoj se e kanë gabim. Është një klub i madh, nuk ishte e lehtë. Ka shumë ndeshje dhe sinqerisht nuk e di cila ishte sfida ime më e madhe. Por? Ja që doli mirë”.
Haaland (23) është i mendimit se edhe në periudhën e ardhshme do të përmirësohet më tej dhe do të jetë edhe më i mirë.
“Para se të vija në Angli, kam punuar me trajnerët për shumë gjëra që dua t’i përmirësoj. Kam ende shumë për të mësuar. Mund të përmirësohen. Unë jam i ri dhe jam i lumtur për këtë, sepse mund të bëhem edhe më mirë. Unë jam në vendin e përsosur që të zhvillohem. Skuadra e Pep po bën një punë të përsosur në këtë plan. Jam i lumtur që mund të ndërtoj gjëra të ndryshme dhe të zhvillohem si lojtar”, tha Haaland.
Ai beson se në vitet në vijim edhe me kombëtaren norvegjeze do të arrijë rezultat të mirë.
“Sinqerisht, nuk është e mundur që unë të bëhem kampion edhe me Norvegjinë. Kjo është një përgjigje e sinqertë. Dua të arrij shumë me Norvegjinë dhe shpresoj që në jetën time të kem mundësinë të fitoj një Evropian apo një Botëror me vendin tim. Ky është qëllimi im. Do të punoj shumë për ta realizuar. Vendi im e meriton atë”, tha Haaland, i cili në garën për lojtarin më të mirë në sezonin 2022/23 në Evropë në përzgjedhjen e UEFA-s, u shpall lojtari më i mirë në konkurrencë të ngushtë me bashkëlojtarin e tij nga City, belgun Kevin De Bruyne dhe lojtarin e dikurshëm të PSG-së, argjentinasin Lionel Messi.
