Presidenti i Serbisë Aleksandar Vuçiq tha mbrëmë në një televizion në Beograd se shërbimet ruse të inteligjencës veprojnë në Beograd dhe la të nënkuptohet se ato e vëzhgojnë atë.
Në pyetjen nëse ka komunikuar me ambasadorin rus në Beograd para udhëtimit në Uashington kur u arrit marrëveshja e 4 shtatorit në Shtëpinë e Bardhë, Vuçiqi, deklaroi “mos i nënvlerësoni shërbimet ruse të inteligjencës …”, duke e lënë në gjysmë fjalinë.
Më pas ai tha se për gjithë marrëveshjen e kishte njoftuar edhe Vladimir Putinin.
Duke komentuar këtë, njohësi i çështjeve të sigurisë Agim Musliu, ka thënë se Vuçiqi frikësohet shumë nga rusët, veçmas nga shërbimet e tyre të inteligjencës.
“Aleksandar Vuçiq duket qartë se frikësohet nga shërbimet ruse të inteligjencës dhe mbrëmë në këtë intervistë nuk guxoi ta vazhdojë mendimin për ta. Ai vetëm e pranoi se shërbimet ruse të inteligjencës vazhdimisht e vëzhgojnë politikën e tij”, ka deklaruar Musliu.
Musliu e sheh këtë në aspekt më të gjerë. Ai e ndërlidhi me një periudhë më të gjatë kohore raportin Vuçiq – shërbime sekrete ruse.
“Vuçiçi është frikacak. Para një viti i pyeti rusët me atë pse-në e madhe për rastin e quajtur Kleban, kur oficeri rus i inteligjencës po merrte informacion sekret nga një ish-zyrtar ushtarak serb. Dukej që ishte i hidhëruar në rusët. Kurse, deklarata e mbrëmshme tregon se ai ose është duke u frikësuar nga ta, ose është duke u punuar prapa shpinës”, tha Musliu.
Në fund të vitit të kaluar, Serbinë e tronditi rasti i spiunazhit “Kleban”. Edhe shërbimi serb i inteligjencës BIA kishte dalë publikisht dhe kishte pranuar se rusët kishin vepruar fshehtazi në Beograd kur po përpiqeshin që merrnin informacion ushtarak në Serbi.
Agim Musliu thotë se, raportet e Serbisë dhe Rusisë tash për tash duket se nuk janë aq të brishta, por se evidenton faktin se aty ka një mosbesim reciprok.
“Nëse e shikoni këtë mozaik, atëherë e vëreni se edhe në protestat që ndodhën gjatë verës në Beograd, pati një tension ruso-serb. Aty kishte edhe operativë rusë të inteligjencës. Edhe në këtë rast, Vuçiçi pati reaguar. Por, vërtet ai është frikacak dhe kështu po e qet në lajthitje edhe Bashkimin Evropian, i cili vazhdimisht ka kërkuar nga ai që të pozicionohet ndaj Rusisë sipas politikave evropiane”, ka thënë Musliu.
Shërbimet ruse të inteligjencës kanë shtuar praninë në Ballkanin Perëndimor në vitet e fundit. Në vitin 2016, dy oficerë rusë kishin provuar që përmes një organizimi në mes të serbëve ta vrasin presidentin e Malit të Zi Milo Gjukanoviç. Megjithatë, ndërkohë shumë vende të Ballkanit dëbuan punonjës të ambasadave ruse nga vendet e tyre, duke i dekonspiruar ata si spiunë rusë. Ky reaksion zinxhiror pati pasuar pas rastit Skripal në Londër.
