Shefi i diplomacisë evropiane Josep Borrell ka deklaruar sot se Bashkimi Evropian nuk do të jetë i tërë pa Ballkanin Perëndimor, por gjithashtu paralajmëroi se vendet e rajonit mund të përparojnë drejt anëtarësimit vetëm nëse “qëndrojnë së bashku, me kokat dhe zemrat e bashkuara për të gjetur gjuhën e përbashkët”.
Në një video-mesazh me rastin e debatit në Komitetin e Politikës së Jashtme të Parlamentit Evropian mbi situatën në Ballkanin Perëndimor 25 vjet pas Dejtonit, Borrell deklaroi se nënshkrimi i Marrëveshjes së Dejtonit është një akt i rëndësishëm për të gjithë Evropën, ku sipas tij, shënon fundin e luftës në zemrën e Evropës, e cila shkaktoi 100.000 të vrarë dhe një milion njerëz të përndjekur.
