Kryetari i Partisë Republikane në Serbi, Nikolla Sandulloviq, është paraburgosur, ka konfirmuar Prokuroria e Nishit për Radion Evropa e Lirë (REL)
Siç thuhet në përgjigjen e nënshkruar nga kryeprokurorja Borica Mitiq, paraburgimi i është caktuar atij për shkak të “dyshimit se ka kryer veprën penale të nxitjes së urrejtjes dhe intolerancës kombëtare, racore dhe fetare”.
Ky është gjithashtu konfirmimi i parë zyrtar i masave të marra nga autoritetet zyrtare në Serbi, pas spekulimeve që pasuan emrin e Sandulloviq në ditët e para të vitit 2024, një person me një biografi kontroverse, ku përfshihet edhe plagosja e tij nga shpërthimi i një makine 13 vjet më parë, dhe u arrestua për “përhapje paniku” më 2020 gjatë pandemisë.
Në Serbi, komentet negative vërshonin portalet tabloide në lidhje me postimin që Sandulloviqit e bëri në rrjetin social X (dikur i njohur si Twitter) më 2 janar.
Bëhet fjalë për një video ku shihet ai duke vizituar kompleksin “Adem Jashari” në Prekaz. Nuk thuhet se kur është bërë videoja. Në video, Sandulloviq vendos një kurorë në monumentin që përkujton ngjarjet e 5, 6 dhe 7 Marsit 1998, kur forcat serbe vranë mbi 50 anëtarë të familjes së Adem Jasharit, një nga themeluesit e ish-Ushtrisë Çlirimtare të Kosovës (UÇK).
Një ditë pas publikimit të videos në rrjetin X, avokati Çedomir Stojkoviq bëri të ditur se Sandulloviqi është arrestuar më 3 janar dhe se familja e tij nuk ka asnjë informacion për vendndodhjen e tij.
Stojkoviq vazhdoi me njoftimet e tij atë ditë edhe të nesërmen dhe në mbrëmjen e 3 janarit deklaroi se ishte bastisur banesa e Sandulloviqit në komunën e Beogradit “Savski venac”. Duke vepruar kështu, ai ndau një foto të urdhrit të bastisjes të lëshuar nga Gjykata e Lartë Publike në Beograd.
Në një nga postimet e fundit, të publikuar pak para përfundimit të këtij teksti, Stojkoviq publikoi edhe një dokument nga Drejtoria e Policisë Kriminale e Serbisë, ku thuhet se ndalimi i Sandulloviqit ka ndodhur për shkak të publikimit të një postimi në X nga Prekazi.
REL-i nuk mund ta konfirmojë vërtetësinë e këtij dokumenti.
