Mbrojtja Civile e Arabisë Saudite ka lëshuar një sërë paralajmërimesh, përfshirë edhe për qytetin e Mekës, ku ndodhet vendi më i shenjtë i Islamit. Paralajmërime të tilla zakonisht tregojnë për një rrezik të mundshëm nga sulmet me raketa.
“Platforma Kombëtare e Paralajmërimit të Hershëm ka lëshuar një alarm në qytetin e Mekës për të sinjalizuar një rrezik të mundshëm”, thuhet në njoftim.
Paralajmërime të veçanta janë lëshuar gjithashtu për Yanbu në Detin e Kuq, si dhe për zonat e Taifit, Xhedahut dhe Tabukut.
Këto paralajmërime vijnë në një periudhë tensionesh të shtuara rajonale dhe kërcënimesh të shpeshta nga raketat balistike dhe dronët ndaj infrastrukturës kryesore dhe qendrave urbane në Arabinë Saudite.
Në situata të tilla, autoritetet u bëjnë thirrje qytetarëve dhe rezidentëve që të ndjekin udhëzimet zyrtare, të qëndrojnë në gatishmëri dhe të shmangin hapësirat e hapura gjatë kohës së alarmit.
