“Asnjë rrezik apo dëm për komunitetet, autoritetet morën të gjitha masat për të ruajtur rendin”, sipas deklaratës nga policia kufitare
Moldavia njoftoi se kishte gjetur fragmente të një droni rus pranë kufirit të saj me Ukrainën, ndërsa konflikti midis Moskës dhe Kievit do të hyjë në vitin e tretë, raporton Anadolu.
Policia Kufitare e Moldavisë në një deklaratë të dielën tha se autoritetet zbuluan fragmente të një droni Shahed pranë komunës Etulia, e cila është afër kufirit të saj me Ukrainën.
Duke treguar se nuk kishte rreziqe apo dëm për komunitetet në zonë, policia tha se janë marrë të gjitha masat e nevojshme për të ruajtur “rendin, paqen dhe sigurinë publike”.
Fragmentet e dronit u morën më vonë nga ekspertët për ekzaminim, tha policia, duke shtuar se droni dyshohet të jetë rrëzuar nga sistemet anti-ajrore gjatë një sulmi rus në rajonin jugperëndimor të Ukrainës Odesa javën e kaluar.
Presidentja e Moldavisë, Maia Sandu tha në X se “zbulimi i mbetjeve të dronit Shahed në Moldavinë jugore sot shërben si një tjetër kujtesë e realitetit të zymtë me të cilin përballemi. Agresioni i Rusisë rrezikon të gjithë kontinentin. Mbështetja për Ukrainën duhet të vazhdojë”.
