Policia në Mal të Zi ka lokalizuar dhe kontrolluar edhe një banesë tjetër në Tivar, të cilën e përdornin shtetasit e Federatës Ruse, A. K. (31) dhe A. K. (42), të dyshuar për pastrim parash dhe kontrabandë.
Me këtë vazhdim të operacionit, vlera e përgjithshme e parave të sekuestruara në këtë rast ka tejkaluar një milion euro.
Kontrollin e banesës në Tivar e kryen zyrtarët e Qendrës Rajonale të Policisë Kufitare Jug dhe të Sektorit për Luftimin e Krimit Ndërkufitar, në bashkëpunim me Departamentin e Sigurisë në Tivar dhe me urdhër të gjykatës kompetente.
Gjatë kontrollit u gjet një sasi e madhe pajisjesh të teknologjisë së informacionit, mjete të ndryshme komunikimi dhe para në disa valuta: 53.689 euro (105.000 marka konvertibile), 277.650 dinarë (4.620 marka), 523.000 rubla (10.795 marka), 700 shekelë izraelitë (343 marka) dhe 905 lira turke (44 marka).
Të gjitha sendet dhe paratë u sekuestruan me urdhër të prokurorit të shtetit dhe do t’i nënshtrohen ekspertizave të hollësishme kriminalistike dhe forenzike, për të përcaktuar prejardhjen, qëllimin e përdorimit dhe lidhjen e mundshme me vepra të tjera penale.
Siç kemi raportuar më herët, shtetasit rusë A. K. (31) dhe A. K. (42) u arrestuan më 23 shtator në Aeroportin e Tivatit, pasi gjatë kontrollit policor u konstatua se kishin me vete plot 19 valixhe.
Në atë rast, në posedim të tyre u gjetën 26.210 euro, 1.150 shekelë izraelitë, një sasi e madhe pajisjesh të padeklaruara të teknologjisë së informacionit, barna dhe disa pajisje të specializuara komunikimi që ata i përdornin.
Deri më tani, në kuadër të këtij hetimi të gjerë, janë gjetur para në valuta të ndryshme me vlerë të përgjithshme mbi një milion euro, si dhe një sasi e konsiderueshme pajisjesh elektronike dhe komunikimi.
Drejtoria e Policisë së Malit të Zi thekson se Sektori i Policisë Kufitare, në bashkëpunim me prokuroritë kompetente dhe Agjencinë e Sigurisë Kombëtare (ANB), po vazhdon veprimet e gjera për të përcaktuar prejardhjen dhe lëvizjen e parave, qëllimin e përdorimit të pajisjeve, si dhe për të identifikuar personat e mundshëm të lidhur me rastin dhe komunikimet e të dyshuarve me struktura të tjera në Mal të Zi dhe jashtë vendit.
