Aleksandar Vuçiq, i cili së fundmi dha dorëheqje nga posti i presidentit të Serbisë, foli për CNN-in rreth zgjedhjeve të ardhshme, por edhe për varrimin e të dënuarit për krime lufte, Ratko Mladiq.
Në fillim të intervistës, gazetari i CNN-it, Fareed Zakaria, e pyeti Vuçiqin për varrimin e Mladiqit. Gazetari theksoi se “ka raportime se Qeveria e Serbisë ka siguruar aeroplanin për transportimin e trupit dhe se djali i tij ka marrë pjesë në varrim”.
Vuçiq mohoi se bëhej fjalë për një ceremoni me nderime shtetërore, duke theksuar se zyrtarët më të lartë nuk kishin marrë pjesë, ndërsa djali i tij kishte qenë atje vetëm në cilësi private.
“Nuk është e lehtë ta shpjegosh këtë për një ose dy minuta, por do të bëj çmos. Para së gjithash, nuk shoh asgjë për të cilën ne duhet të justifikohemi, sepse nuk kemi bërë asgjë të keqe. Sa i përket aeroplanëve, natyrisht që duhej të siguronim në mënyrë të denjë dhe të civilizuar të gjithë logjistikën për varrimin, ashtu siç kemi bërë edhe me të gjithë të tjerët”, tha Vuçiq.
Ai theksoi se nuk bëhej fjalë për varrim shtetëror dhe as për ceremoni me nderime shtetërore.
“Djali im ishte atje sepse dëshironte të shkonte. Ishte një vizitë private. Ai nuk është zyrtar i vendit tim. E dua shumë, por kjo është zgjedhja e tij”, tha Vuçiq.
Vuçiq shtoi se as ai dhe as kryeministri nuk kishin marrë pjesë në varrim.
“Por problemi i vërtetë ishte diçka tjetër. Ishte numri i njerëzve. Ishte varrimi më i madh në 40 apo 50 vitet e fundit. U organizua të hënën, gjatë orarit të punës. Dhe atëherë kam një pyetje për ju, por edhe për veten dhe për të gjithë ne: Pse u shfaqën kaq shumë njerëz atje? A besoni vërtet se ata njerëz janë përbindësha, kasapë, për të përdorur të gjitha këto terma? Jo. Apo se ata mbështesnin një përbindësh, një kasap apo çfarëdo tjetër? Jo. Ata njerëz besonin se gjatë 20 apo 30 viteve të fundit na kanë ndodhur shumë padrejtësi. Sepse me shumë gjasë nuk keni dëgjuar kurrë për Rasim Deliqin nga Sarajeva. Ai ishte i dënuar për krime. Ndërsa zyrtarët më të lartë të Bosnjë-Hercegovinës morën pjesë në varrimin e tij, ndryshe nga ne”, tha Vuçiq për CNN-in.
Gazetari parashtroi më pas tezën se numri i madh i njerëzve në varrimin e Mladiqit mund të lidhej me rritjen e nacionalizmit në Serbi dhe se politikanë si Vuçiq e kishin nxitur atë.
“Jo, aspak. Ajo që i kam thënë popullit tim, dhe po jua them edhe juve, e kam thënë publikisht. Para së gjithash, shkova në Srebrenicë në 20-vjetorin e saj. Ula kokën dhe atje pothuajse u linçova, pothuajse u vrava. Askush nuk u përgjigj për këtë. Askush nuk u mbajt përgjegjës. Vetëm dy muaj më vonë prita në Beograd udhëheqjen e Bosnjë-Hercegovinës dhe u shtrëngova duart. Dhe atëherë thashë, ashtu siç do ta them edhe sot: Po, më vjen keq për faktin që kaq shumë boshnjakë u vranë në Srebrenicë. Gjithmonë do të jem në gjendje të ul kokën para memorialit dhe të them se sa keq na vjen dhe gjithçka tjetër”, theksoi Vuçiq.
Gazetari e pyeti gjithashtu nëse kalimi i tij nga posti i presidentit në atë të kryeministrit përfaqëson një formë të autoritarizmit gradual sipas modelit të Vladimir Putinit, por Vuçiq e mohoi këtë.
Ai theksoi gjithashtu se Serbia do ta ruajë paqen dhe stabilitetin në rajon. Në fund, Vuçiq tha se Serbinë e presin zgjedhje të rëndësishme.
“Unë jam demokrat dhe gjithmonë do të doja të dëgjoja dhe të shihja se çfarë mendojnë njerëzit. Pa legjitimitet nuk do të isha askush. Do të kemi një garë të madhe, shumë të vështirë, zgjedhje të rëndësishme, një garë politike dhe do të shohim se kush do të fitojë. Nëse fiton pala tjetër, do t’i uroj po atë mbrëmje dhe kaq. Kështu funksionon demokracia”, përfundoi Vuçiq.
