Kombëtarja e Bosnjës dhe Hercegovinës ka pësuar humbje 3-2 në udhëtim ndaj Suedisë, në kuadër të Ligës së Kombeve të UEFA-s, duke humbur mundësinë për ta përfunduar grupin në vendin e parë.
Bosnja dhe Hercegovina e nisi dobët ndeshjen e zhvilluar në qytetin Solna të Suedisë, duke pësuar gol që në minutën e 5-të nga Daniel Svensson.
Skuadra vendase dyfishoi epërsinë në minutën e 11-të, kur Viktor Gyökeres realizoi nga pika e bardhë e penalltisë. Suedia shënoi edhe në minutën e 24-t me Alexander Isak, por goli u anulua pas rishikimit nga VAR-i.
Në minutat shtesë të pjesës së parë, Suedia fitoi edhe një penallti, të cilën Gyökeres e shndërroi në gol, duke e mbyllur pjesën e parë me epërsi 3-0.
Rikthimi i Bosnjës dhe Hercegovinës nuk mjaftoi
Skuadra e drejtuar nga trajneri Sergej Barbarez e nisi fuqishëm pjesën e dytë. Armin Gigović ngushtoi rezultatin në minutën e 47-të, pas një asistimi nga Ermin Mahmić.
Në minutën e 62-të, Sead Kolašinac shënoi pas një pasimi nga Kerim Alajbegović, duke e çuar rezultatin në 3-2.
Në minutat e mbetura, Bosnja dhe Hercegovina krijoi disa mundësi për të barazuar rezultatin, por nuk arriti të shënonte golin e tretë dhe u largua nga fusha e mposhtur.
Me këtë fitore, Suedia arriti në 13 pikë, ndërsa Bosnja dhe Hercegovina mbeti me 8 pikë, duke siguruar vendin e dytë në grup.
Gjithashtu, Bosnja dhe Hercegovina ka siguruar të drejtën për të qenë në vazon e dytë gjatë shortit të kualifikimeve për Kampionatin Evropian të Futbollit EURO 2028.
