Njeriu që më pas u bë piloti kryesor i trafikut të kokainës për Pablo Escobarin, ka treguar për herë të parë historinë e tij në një podcast të ri. Tirso “TJ” Dominguez, i njohur edhe si Tito, rrëfen se në fillim kishte refuzuar të punonte për Escobarin, pasi tashmë fitonte 4 milionë dollarë në muaj duke punuar për një kartel rival.
Por gjithçka ndryshoi kur Escobar – i njohur si Patrón – i ofroi 20 milionë dollarë në muaj për katër fluturime, shifër që Dominguez e pranoi pa hezitim.
Në podcastin Cocaine Air, Dominguez përshkruan një jetë luksi ekstrem, me 30 Lamborghini, avionë privatë dhe një luan malor si kafshë shtëpiake. Ai thotë se fillimisht ishte futur në trafikun e drogës pas një mashtrimi bankar që i rrënoi familjen, duke e shtyrë drejt kontrabandës me marijuanë, e më pas me kokainë.
Duke qenë një pilot i besueshëm që kurrë nuk humbi një ngarkesë, ai tërhoqi vëmendjen e Escobarit, i cili fillimisht e paguante me para, por më vonë me kokainë. Kjo e bëri Dominguezin jo vetëm transportues, por edhe shpërndarës dhe larës parash.
Ai përfundoi në burg në vitin 1988, kur autoritetet amerikane bastisën vilën e tij në Florida dhe e akuzuan për futjen e mbi pesë tonëve drogë në SHBA. Në vitin 1991, pranoi fajin dhe kaloi 13 vjet në burg, dy prej tyre në izolim për planifikim arratisjeje me helikopter.
Sot, në moshën 73-vjeçare, ai thotë se e ka shlyer borxhin ndaj shoqërisë dhe dëshiron të jetë një biznesmen i ndershëm.
