Prefektura e Normandisë ka publikuar një listë të gjërave që çdo familje duhet t’i ketë të përgatitura në një çantë në rast të një fatkeqësie të madhe, kur mund të ndërpriten energjia elektrike, gazi dhe uji, ndërsa rrugët të bëhen të pakalueshme.
Sipas njoftimit të prefekturës në rrjetin X, 72 orët e para pas një katastrofe të madhe janë shpesh më të vështirat. Një çantë e përgatitur paraprakisht ndihmon që ndihma të pritet më qetë në shtëpi dhe është e dobishme edhe në rast se banesa duhet të braktiset me urgjencë.
Në çantë duhet të ketë ujë të pijshëm të mjaftueshëm, rreth gjashtë litra për person në shishe, si dhe ushqime që nuk prishen dhe nuk kanë nevojë për gatim, si konserva dhe biskota. Autoritetet franceze këshillojnë që të mos harrohen ushqimet për foshnjat dhe kafshët shtëpiake.
Në listë përfshihen edhe barnat që anëtarët e familjes përdorin rregullisht, si dhe një kuti e ndihmës së parë me alkool, fasha dhe kompresa.
Rekomandohet gjithashtu një radio me bateri dhe bateri rezervë, për të ndjekur udhëzimet e autoriteteve. Duhet të ketë edhe një llambë dore me bateri rezervë, qirinj, çakmak ose shkrepëse, si dhe një karikues për telefonin.
Prefektura këshillon që në çantë të mbahet edhe një sasi parash të gatshme, pasi bankomatet mund të mos funksionojnë. Gjithashtu rekomandohen çelësa rezervë të shtëpisë dhe makinës, si dhe fotokopje të dokumenteve të rëndësishme, si letërnjoftimi dhe recetat mjekësore, të vendosura në një qese të papërshkueshme nga uji.
Lista plotësohet me rroba të ngrohta dhe një batanije termike, mjete bazë si thikë shumëfunksionale dhe hapëse konservash, syze rezervë për ata që i përdorin, si dhe lojëra shoqërore për ta kaluar më lehtë kohën.
Çanta duhet të mbahet në një vend lehtësisht të arritshëm dhe përmbajtja e saj duhet të kontrollohet një herë në vit, veçanërisht afati i përdorimit të ushqimeve dhe barnave, si dhe gjendja e baterive.
Pas përdorimit, çanta duhet të plotësohet përsëri me të gjitha gjërat e nevojshme.
