Ish-kryeministri hungarez Viktor Orbán e ka cilësuar ndalimin e vëllait të tij më të vogël, Áron Orbán, si përndjekje politike, duke pretenduar se ai vetë është objektivi i vërtetë dhe se qeveria e Péter Magyarit po përpiqet të largojë vëmendjen nga seanca dëgjimore për arkivat e policisë sekrete komuniste.
“Sot, qeveria duhet të japë llogari para Komisionit për Siguri Kombëtare lidhur me mënyrën e trajtimit të arkivave të policisë sekrete komuniste. Megjithatë, në vend që të përballet me kontrollin, ajo po përdor përndjekjen politike për të larguar vëmendjen. Ajo që po ndodh në Hungari nuk është llogaridhënie. Kjo është një gjueti politike shtrigash”, deklaroi Orbán.
Ai vlerësoi se sa herë që qeveria përballet me një situatë të pakëndshme, përdor metoda të ngjashme me ato të policisë sekrete komuniste.
Sipas tij, qëllimi i kësaj “loje të pistë politike” është eliminimi i kundërshtarëve politikë dhe krijimi i një shteti njëpartiak.
“Unë jam objektivi i vërtetë. Vëllai im më i vogël po përdoret vetëm për të arritur tek unë”, theksoi Orbán.
Operacion policor nën dyshimet për kontrabandim me njerëz
Portali hungarez Kontroll raportoi më herët të hënën se Áron Orbán ishte në mesin e personave të ndaluar gjatë një operacioni të përbashkët të Zyrës Kombëtare për Rikuperimin dhe Mbrojtjen e Pasurisë (NVVH) dhe Byrosë Kombëtare të Hetimeve (NNI), të zhvilluar në Budapest dhe në qarkun e Pestit.
Policia njoftoi se disa persona janë arrestuar në kuadër të dy procedurave penale paralele, por nuk i bëri publikë emrat e tyre.
Kryeministri Péter Magyar shkroi në Facebook se, sipas informacioneve të publikuara në media, Áron Orbán është ndaluar nën dyshimin për kontrabandim me njerëz dhe se NVVH dhe NNI po vazhdojnë hetimet.
Emri i Áron Orbánit ishte përmendur edhe më herët në një skandal lidhur me vizat.
Sipas mediave hungareze, kompania e tij regjistronte shtetas vietnamezë në një kurs të ndihmës së parë në Universitetin e Pécsit, gjë që mund t’ua lehtësonte atyre marrjen e vizave Shengen.
Në kuadër të të njëjtit skandal, në prill ishin arrestuar dy bashkëpunëtorë të tij, ndërsa NVVH kishte marrë përsipër hetimet nga prokuroria në muajin shtator.
