Ish-presidenti i Venezuelës, Nicolás Maduro, i cili po pret gjykimin në një burg në Brooklyn të Shteteve të Bashkuara, pjesën më të madhe të kohës e kalon duke lexuar tekste fetare, përfshirë Biblën dhe Kuranin, ndërsa ka humbur ndjeshëm peshë, shkruan New York Times.
Gazeta amerikane i mbështet këto informacione në bisedat me gjashtë persona që kanë njohuri për qëndrimin e Maduros në Qendrën Metropolitane të Paraburgimit (MDC) në Brooklyn, ku ai ndodhet që nga janari, kur u kap nga forcat amerikane në Karakas.
Sipas burimeve, Maduro po studion tekste fetare dhe filozofike, si dhe është takuar me përfaqësues fetarë të burgut, përfshirë një prift katolik dhe një rabin.
Burimet e New York Times e përshkruajnë interesimin e tij për spiritualitetin si diçka që ka ekzistuar prej shumë vitesh.
Maduro më herët kishte deklaruar publikisht se ka prejardhje hebraike, duke e përshkruar veten si pasardhës të komunitetit sefardik, i cili ishte shpërngulur nga Antilet Holandeze në Venezuelë.
Megjithatë, sipas personave të afërt me të, ai nuk kishte shfaqur interesim të veçantë për judaizmin deri në momentin e arrestimit.
Ish-presidenti është katolik praktikues. Gjatë kohës sa ishte në pushtet, ai ishte përpjekur të fitonte mbështetjen e të krishterëve ungjillorë në Venezuelë dhe kishte mbajtur marrëdhënie të afërta me një prift që përkrahte idetë socialiste.
Maduro ka humbur ndjeshëm peshë gjatë qëndrimit në burg
Personat që kanë njohuri për gjendjen e tij thonë se Maduro ka humbur ndjeshëm peshë që nga mbërritja në burg.
Dy burime të New York Times pohojnë se në këtë ndryshim ka ndikuar edhe ushqimi i burgut, për cilësinë e të cilit Maduro është ankuar.
Nga ana tjetër, djali i tij, Nicolás Maduro Guerra, kishte deklaruar më herët se babai i tij dukej më i dobët për shkak se ushtron aktivitet fizik çdo ditë.
Qendra Metropolitane e Paraburgimit në Brooklyn është kritikuar prej vitesh për kushtet e këqija të qëndrimit. Avokatët dhe ish-të burgosurit janë ankuar gjithashtu për ushqimin e prishur që u është shërbyer të burgosurve.
Maduro dhe bashkëshortja e tij, Cilia Flores, janë deklaruar të pafajshëm ndaj akuzave për trafikim të drogës.
