Prokurori i Përgjithshëm Ushtarak i Izraelit ka urdhëruar një hetim për krime të mundshme lufte, pas pretendimeve se forcat izraelite kanë qëlluar me qëllim ndaj civilëve palestinezë pranë pikave të shpërndarjes së ndihmës në Gaza, raportoi të premten gazeta Haaretz.
Sipas spitalëve lokale dhe zyrtarëve palestinezë, qindra palestinezë janë vrarë gjatë muajit të kaluar në zonat ku shpërndahej ushqimi. Haaretz citoi ushtarë izraelitë anonimë të cilët thanë se kishin marrë urdhër të qëllonin drejt turmave për t’i larguar ato nga zonat e ndihmës, duke përdorur forcë vdekjeprurëse edhe ndaj personave që nuk përbënin asnjë kërcënim.
Gazeta raportoi gjithashtu se zëdhënësi ushtarak izraelit deklaroi se po bëhen përpjekje për të zvogëluar përplasjet mes civilëve dhe ushtrisë izraelite. Pas raporteve për viktima civile, janë ndërmarrë hetime dhe janë dhënë udhëzime të reja për trupat në terren.
Sipas burimeve të paidentifikuara, një njësi ushtarake e specializuar për të hetuar shkeljet e mundshme të të drejtës ndërkombëtare është ngarkuar të shqyrtojë sjelljen e ushtarëve në pikat e shpërndarjes së ndihmave muajin e fundit.
Kampanja ushtarake dyvjeçare e Izraelit kundër Hamasit në Gaza ka çuar në shkatërrimin e një pjese të madhe të territorit dhe zhvendosjen e pjesës më të madhe të mbi dy milionë banorëve. Mijëra persona mblidhen çdo ditë rreth qendrave të ndihmave duke pritur në mënyrë të dëshpëruar dërgesat, ndërsa përditë raportohen të shtëna dhe viktima në rrugët hyrëse.
Sipas institucioneve shëndetësore në Gaza, që nga fundi i majit mbi 500 persona janë vrarë në afërsi të qendrave të ndihmës që menaxhohen nga Fondacioni i Ndihmës Humanitare të Gazës (GHF), i mbështetur nga SHBA, ose në zonat ku kalojnë kamionët me ndihma të Kombeve të Bashkuara.
Ushtarët izraelitë shpesh kanë pretenduar se kanë qëlluar në ajër për të shpërndarë turmat dhe se disa raste janë ende duke u hetuar, por rezultatet e këtyre hetimeve ende nuk janë bërë publike.
Në një takim të mbyllur me zyrtarë të lartë këtë javë, përfaqësuesit ligjorë e kanë kundërshtuar versionin zyrtar të ushtrisë, duke deklaruar se këto nuk janë raste të izoluara.
