Kapiteni i kombëtares së Zvicrës dhe mesfushori i klubit anglez Sunderland, Granit Xhaka (33), është vënë në qendër të një skandali të madh, pasi ndaj tij është hapur një hetim nën dyshimin se ka siguruar dhe përdorur një certifikatë të falsifikuar Covid.
Prokuroria e Kantonit të Lucernit konfirmoi se po zhvillon procedurë ndaj futbollistit 33-vjeçar, por edhe ndaj një mjekeje nga Lucerni, ordinanca e së cilës ishte bastisur nga policia që në vitin 2023.
Mjekja dyshohet se ka lëshuar një numër të madh certifikatash të falsifikuara vaksinimi. Mes tyre dyshohet se ishte edhe dokumenti i Xhakës, në të cilin thuhej se ai e kishte marrë vaksinën kundër koronavirusit, ndonëse vaksinimi pretendohet se nuk kishte ndodhur kurrë.
Sipas informacioneve të publikuara, Xhaka pritet të paraqitet në fillim të tetorit në Prokurorinë e Lucernit për të dhënë deklaratën e tij.
Eksperti ligjor André Kuhn shpjegoi për gazetën zvicerane “Blick” se vepra penale e falsifikimit të dokumenteve trajtohet jashtëzakonisht seriozisht në Zvicër. Për këtë vepër parashikohet gjobë ose dënim me burgim deri në pesë vjet.
Megjithatë, ekspertët theksojnë se, nëse shpallet fajtor dhe nuk ka dënime të mëparshme, Xhaka ka të ngjarë të marrë një dënim me gjobë me kusht, të shoqëruar me një sanksion shtesë deri në 10 mijë franga zvicerane.
Përveç pasojave ligjore, rasti mund të ndikojë edhe në karrierën e Xhakës te klubi anglez Sunderland, ku luan që nga viti 2025.
Kontratat në Premier League përmbajnë klauzola të rrepta për dëmtimin e rëndë të reputacionit të klubit, të njohura si “gross misconduct”. Në skenarin më të keq, një shkelje e tillë mund t’i japë klubit të drejtën ta ndërpresë kontratën në mënyrë të njëanshme.
Prokuroria theksoi se procedura ndodhet në fazën fillestare dhe se për Granit Xhakën dhe mjeken e dyshuar vlen prezumimi i pafajësisë derisa fajësia e tyre të vërtetohet nga gjykata.
