“Kjo vizitë e rëndësishme dëshmon rëndësinë e dialogut dhe bashkëpunimit për paqen dhe stabilitetin në rajon”, shkroi Osmani
Presidentja e Kosovës, Vjosa Osmani, ka pritur në takim ministrin e Punëve të Jashtme të Bosnjë dhe Hercegovinës, Elmedin Konakoviq, transmeton Anadolu.
Takimi midis presidentes Osmani dhe ministrit Konakoviq, u realizua në kuadër të Forumit Ndërkombëtar për Gratë, Paqen dhe Sigurinë, në Prishtinë.
“Sot mirëprita Ministrin e Punëve të Jashtme të Bosnjë e Hercegovinës, Elmedin Konakoviq, i cili e pranoi ftesën time për të marrë pjesë në Forumin Ndërkombëtar për Gratë, Paqen dhe Sigurinë. Kjo vizitë e rëndësishme dëshmon rëndësinë e dialogut dhe bashkëpunimit për paqen dhe stabilitetin në rajon”, shkroi Osmani.
Forumi Ndërkombëtar për Gratë, Paqen dhe Sigurinë do të mbahet më 2 dhe 3 qershor dhe pritet të mbledhë mbi 150 folës nga më shumë se 45 vende të botës, të cilët do të marrin pjesë në më shumë se 30 panele diskutimi.
