Elon Musk sulmoi ashpër sot projektligjin e presidentit Donald Trump – një ligj për të cilin presidenti po ushtron presion mbi senatorët republikanë që ta mbështesin – duke e quajtur “një tmerr të neveritshëm”.
“Na ndjeni, por nuk mund ta duroj më. Ky ligj i stërmadh dhe skandaloz për shpenzime, i mbushur me pika dhe shpenzime të panevojshme, është një tmerr i vërtetë,” shkroi miliarderi në rrjetin social X.
Ai shtoi: “Turp për ata që kanë votuar për këtë: e dini që keni gabuar. E dini mirë.”
Në një postim tjetër shtoi: “Kongresi po e çon Amerikën drejt falimentimit.”
Kjo nuk është hera e parë që Musk e kritikon ligjin. Në një intervistë pas miratimit të paketës nga republikanët në Dhomën e Përfaqësuesve, Musk kishte thënë se ishte “i zhgënjyer” me këtë ligj gjigand, duke shtuar se ai “do ta rrisë deficitin buxhetor, në vend që ta zvogëlojë” dhe se minon “punën që ekipi për efikasitet shtetëror (DOGE) po përpiqet të arrijë”.
Zëdhënësja e Shtëpisë së Bardhë, Karoline Leavitt, u pyet për deklaratat e Musk gjatë një bisede me gazetarë.
“Shikoni, presidenti e di tashmë se çfarë mendon Elon Musk për këtë ligj. Kjo nuk e ndryshon mendimin e presidentit – ky është një ligj i madh dhe i mrekullueshëm dhe ai nuk do të tërhiqet nga ai,” tha Leavitt.
Musk, të cilit më parë i ishte dhënë status i posaçëm si i punësuar në administratë për të udhëhequr Ministrinë për Efikasitetin Shtetëror, zyrtarisht u largua nga administrata të premten.
Menjëherë pas deklaratave të Musk në X, senatori republikan Rand Paul u shpreh se pajtohej me miliarderin, duke shtuar: “Mundemi dhe duhet të bëjmë më mirë.”
“Të dy jemi dëshmitarë të shpërdorimeve masive në shpenzimet e qeverisë dhe e dimë se edhe 5 trilionë dollarë borxh është një gabim i madh,” shkroi Paul në X.
Presidenti të hënën zhvilloi biseda me disa senatorë republikanë, përfshirë Paulin, i cili shprehu shqetësim për koston e politikave të brendshme të Trumpit. Senati është aktualisht duke shqyrtuar disa amendamente të ligjit, ndërsa drejtuesit e Kongresit synojnë që paketa të finalizohet dhe t’i dërgohet Trumpit për nënshkrim deri më 4 korrik.
Paul tha për CNN të hënën se “kishte pasur një bisedë të gjatë” me Trumpin këtë javë dhe i kishte thënë presidentit se nuk mund ta mbështesë ligjin nëse përfshin rritjen e kufirit të borxhit publik.
Lideri i shumicës në Senat, John Thune, ka thënë se nuk do të heqë formulimin që përfshin rritjen e kufirit të borxhit.
“Kjo thjesht nuk është konservatore, dhe ia thashë se nuk mund ta mbështes ligjin nëse këto dy gjëra janë të lidhura bashkë. Nëse ato ndahen dhe hiqet rritja e kufirit të borxhit, atëherë shumë gjasa është që mund ta shqyrtoj pjesën tjetër të ligjit,” tha Paul, duke shtuar se Trump “e udhëhoqi pjesën më të madhe të bisedës vetë”.
