Izraeli ka nisur planifikimet për sulme ndaj Iranit që në dhjetor, pasi shkatërrimi i grupit Hezbollah dhe dobësimi i regjimit të Assadit në Siri kanë hapur një korridor ajror të lirë – raporton New York Times.
Sipas raportit, kur kryeministri izraelit Benjamin Netanyahu vizitoi Shtëpinë e Bardhë në shkurt, ai mbajti një prezantim të detajuar për presidentin amerikan Donald Trump në Zyrën Ovale, lidhur me programin bërthamor të Iranit.
Në raport thuhet se, përballë mundësive për t’u bashkuar në sulm apo për të qëndruar jashtë konfliktit, Trump zgjodhi një rrugë të mesme: ai vendosi t’i ofrojë Izraelit një mbështetje të fshehtë nga komuniteti amerikan i inteligjencës për realizimin e sulmeve.
Raporti përshkruan në detaje një ndryshim të dukshëm në qëndrimin e Trumpit ndaj Iranit gjatë muajve dhe ditëve të fundit.
“Kur Trump u zgjua të premten në mëngjes, kanali i tij i preferuar Fox News po transmetonte pamje të asaj që konsiderohej një manovër gjeniale e ushtrisë izraelite. Dhe z. Trump nuk mundi të përmbahej pa marrë një pjesë të meritës për këtë”, shkruan gazeta.
New York Times përfundon se, duke pasur parasysh që Trump ka sugjeruar përfshirje të drejtpërdrejtë të SHBA-së, ka pak gjasa që konflikti të përfundojë shpejt në mënyrë diplomatike.
