Presidenti i ri i Polonisë është Karol Nawrocki, i cili në raundin e dytë të zgjedhjeve mposhti kryetarin e Varshavës, Rafal Trzaskowski, me një diferencë prej më pak se 400.000 votash.
Nawrocki ishte fitues edhe në raundin e parë të zgjedhjeve presidenciale, dhe pas “konfirmimit” të kësaj fitoreje në raundin e dytë, do të marrë detyrën nga bashkëmendimtari i tij politik, Andrzej Duda.
Partitë e djathta, të udhëhequra nga Partia për Ligj dhe Drejtësi (PiS), e zgjodhën Nawrockin si kandidatin e tyre presidencial, gjë që ishte një lloj befasie pasi bëhet fjalë për një person pa përvojë politike.
E kaluara e tij lidhet më shumë me sportet luftarake sesa me politikën, pasi ai është një ish-boksier. Me këtë sport është marrë më shumë se 20 vjet më parë dhe madje ka qenë edhe kampion në kategorinë e rëndë.
Përveç karrierës së tij si boksier, nga e kaluara e tij është zbuluar edhe se ka marrë pjesë në përleshje huliganësh.
Këto informacione u zbuluan gjatë fushatës presidenciale, dhe Nawrocki pranoi se kishte marrë pjesë në përleshje huliganësh, megjithëse e justifikoi këtë duke thënë se “luftimet ishin të ndershme, pavarësisht formës”.
“Të gjitha aktivitetet e mia sportive ishin të bazuara në fuqinë e zemrës sime, forcën e muskujve dhe grushtave të mi,” tha Nawrocki.
Sa i përket përvojës së tij profesionale, që nga viti 2009 Nawrocki ka qenë anëtar i Institutit Kombëtar të Kujtesës, ku mbajti funksione të ndryshme deri në vitin 2017, kur u bë drejtor i Muzeut të Luftës së Dytë Botërore në Gdanjsk.
Katër vjet më vonë, ai u rikthye në institutin “amë”, fillimisht si zëvendëspresident, dhe në korrik të vitit 2021 u emërua president pasi u konfirmua nga të dy dhomat e parlamentit polak.
Nawrocki është autor i disa librave që kryesisht trajtojnë periudhën e sundimit komunist në Poloni, por edhe historinë e sportit dhe krimin e organizuar.
Pjesa më interesante e karrierës së tij në këtë kontekst janë disa libra të publikuar me pseudonimin Tadeusz Batyr, të cilët flasin për jetën e një krimineli në Poloni gjatë viteve 1980.
Për ta bërë çështjen edhe më të çuditshme, Nawrocki shfaqej në televizion si Batyr, me një kapelë në kokë dhe me fytyrë të turbulluar, duke deklaruar se “Nawrocki e frymëzoi” dhe se “Nawrocki ishte i pari që hetoi krimin e organizuar në Poloni”.
Që nga hyrja në politikë, Nawrocki është veçuar si një politikan jashtëzakonisht konservator, dhe mesazhet e tij shpesh ngjajnë me ato të fushatës së presidentit amerikan Donald Trump.
Për këtë arsye, Trump e ka mbështetur Nawrockin në disa forma, përfshirë një takim në Shtëpinë e Bardhë në maj të këtij viti dhe thirrje drejtuar polakëve që të votojnë për të.
Nawrocki, vlen të theksohet, është disi ndryshe nga politikanët e tjerë të djathtë në Evropë, si kryeministri hungarez Viktor Orban, sa i përket agresionit rus ndaj Ukrainës.
Ai e ndërtoi fushatën e tij, në aspektin e politikës së jashtme, mbi forcimin e ushtrisë polake për shkak të kërcënimit nga Rusia, për të cilën thotë se “në thelb ka terror, qoftë ai i bardhë, i kuq apo modern”.
Përveç kësaj, Nawrocki, sipas pothuajse të gjithë parametrave të tjerë, është i ngjashëm me politikanët e djathtë në Evropë, veçanërisht në politikat e tij sociale.
Ashtu si partia PiS që e mbështeti fuqishëm, Nawrocki ka qëndrime jashtëzakonisht konservatore për sa i përket abortit, martesave të të njëjtit seks dhe komunitetit LGBT, si dhe ndaj refugjatëve, madje edhe atyre nga Ukraina.
Në çdo rast, duke qenë se aktualisht Polonia ka një shumicë mjaft liberale në parlament, pritet që Nawrocki të ndjekë rrugën e vendosur nga Duda dhe të bllokojë shumë nga ligjet që miraton parlamenti.
Megjithatë, qëndrimet e tij lidhur me NATO-n dhe Ukrainën japin një farë shprese se Nawrocki do të jetë më pak radikal se paraardhësi i tij.
