Kryeministri i Izraelit, Benjamin Netanyahu, vizitoi bazën ajrore Tel Nof, ku zhvilloi takime me pilotët që marrin pjesë në sulmet ajrore ndaj Iranit.
Me këtë rast, Netanyahu përsëriti deklaratën se Izraeli ka kontroll mbi hapësirën ajrore mbi Teheran, gjë që sipas tij u lehtëson sulmet ndaj objektivave iraniane.
“Kjo është një pikë kthese në të gjithë fushatën ushtarake. Jemi në rrugë të mbarë për të realizuar objektivat tona: shkatërrimin e kërcënimeve bërthamore dhe balistike të Iranit,” tha ai.
Netanyahu gjithashtu lëshoi edhe një herë një paralajmërim për popullin e Teheranit, duke i bërë thirrje të evakuohen.
“Kur ne kontrollojmë qiellin mbi Teheran dhe godasim objektiva ushtarake – ndryshe nga Irani që synon civilët tanë dhe vret fëmijë e gra – qytetarëve të Teheranit u themi: ‘Evakuohuni,’” përfundoi Netanyahu.
Këto deklarata vijnë në një moment kur konflikti midis Izraelit dhe Iranit po intensifikohet ndjeshëm, dhe rritet rreziku për një përshkallëzim të mëtejshëm rajonal me pasoja të rënda humanitare.
