Sipas burimeve të NBC News, para se Shtetet e Bashkuara të kryenin sulmin ndaj Iranit, Teherani i kishte dërguar një paralajmërim ish-presidentit Donald Trump, duke kërcënuar se do të aktivizojë “qeliza të fjetura” të grupeve terroriste brenda SHBA-së nëse do të ndërmerrej ndonjë sulm ushtarak.
Mesazhi i Iranit i është përcjellë Trumpit përmes ndërmjetësve gjatë samitit të Grupit të Shtatëshes (G7) në Kanada javën e kaluar. Trump, sipas raportimeve, e kishte lënë samitin më 16 qershor për të diskutuar opsionet përballë përshkallëzimit të konfliktit mes Izraelit dhe Iranit.
Shtëpia e Bardhë nuk ka komentuar ende për raportimet, ndërsa Misioni iranian në OKB ka refuzuar të japë ndonjë deklaratë.
Sipas burimeve, Irani e ka bërë të qartë se çdo sulm amerikan do të pasohet nga aktivizimi i qelizave të fjetura për të ndërmarrë sulme të mundshme brenda territorit amerikan.
Trump dje u shpreh se “çdo kundërpërgjigje iraniane ndaj SHBA-së do të përballet me një forcë shumë më të madhe sesa ajo që është parë deri më tani”.
SHBA në gjendje alarmi për sulme të mundshme të brendshme
Administrata amerikane dhe agjencitë ligjzbatuese në qytete kryesore ndodhen në gjendje gatishmërie për çdo hakmarrje të mundshme brenda territorit të SHBA-së.
Departamenti i Sigurisë Kombëtare paralajmëroi se konflikti me Iranin “ka rritur nivelin e kërcënimit në Shtetet e Bashkuara”.
Në deklaratë thuhet se ekziston rreziku i shtuar për sulme terroriste, veçanërisht nëse udhëheqja iraniane do të shpallë një fetva që thërret për dhunë ndaj objektivave brenda SHBA-së. Po ashtu, paralajmërohet për sulme të mundshme kibernetike ndaj rrjeteve amerikane dhe atentate ndaj zyrtarëve aktualë apo të mëparshëm të qeverisë amerikane që Irani i konsideron përgjegjës për vrasjen e gjeneralit Kasem Soleimani në vitin 2020.
Zëvendëspresidenti JD Vance: Po e shqyrtojmë me shumë kujdes rrezikun
Zëvendëspresidenti amerikan JD Vance deklaroi në emisionin “Meet the Press” të NBC News se administrata është duke e shqyrtuar “me shumë kujdes” mundësinë e një sulmi të brendshëm dhe se beson se organet e zbatimit të ligjit janë në gjendje të përballojnë çdo kërcënim.
Ai gjithashtu theksoi shqetësimin për mungesën e një “liste të plotë” të personave që mund të kenë hyrë në SHBA gjatë presidencës së Joe Biden pa kontroll të duhur. “E dimë se disa nga këta individë kanë qenë në listat e mbikëqyrjes për terrorizëm,” tha Vance.
