Ndërsa po afrohen zgjedhjet paraprake për përzgjedhjen e kandidatit të Partisë Demokratike për kryetar bashkie të New Yorkut, ish-guvernatori i shtetit të New Yorkut, Andrew Cuomo, ka nisur një fushatë gjithnjë e më agresive kundër kundërshtarit të tij më të fortë – Zohran Mamdani.
Mamdani, një emigrant mysliman dhe anëtar i Dhomës së Përfaqësuesve të shtetit të New Yorkut, ka kaluar nga një i panjohur politik në rivalin më të fortë të Cuomos, i cili priste një fitore të lehtë.
Ndërkohë që Mamdani financohet kryesisht nga donacione të vogla deri në 80 dollarë dhe e drejton fushatën e tij kryesisht përmes rrjeteve sociale, Cuomo po përdor miliona dollarë nga donatorët e mëdhenj për të sulmuar kundërshtarin e tij.
Një organizatë politike e lidhur me ish-guvernatorin ka shpenzuar 5.3 milionë dollarë për reklama negative kundër Mamdanit që tashmë po transmetohen në televizionet e New Yorkut.
Në reklama, Mamdani portretizohet si një “radikal” që “do të mbushë metronë me të pastrehë” dhe “do të shpërbëjë policinë”, ndërsa në fund përshkruhet si një “rrezik për qytetin”.
Shuma prej 5.3 milionë dollarësh e shpenzuar vetëm për një fushatë të vetme reklamuese pothuajse tejkalon të gjithë buxhetin e fushatës së Mamdanit, e cila kap pak më shumë se 6.3 milionë dollarë në total.
Sipas sondazheve, Cuomo – i cili ishte detyruar të jepte dorëheqje nga posti i guvernatorit për shkak të një skandali seksual – ende mban epërsinë, por ka gjasa që të mos e arrijë pragun prej 50% të votave që i duhet për të shmangur raundin e dytë të votimit.
Zgjedhjet paraprake të Partisë Demokratike do të mbahen më 24 qershor, ndërsa zgjedhjet për kryetar bashkie të New Yorkut janë planifikuar për në nëntor.
