“Diplomacia funksionoi në të kaluarën, mund të funksionojë përsëri. Por për t’u rikthyer në të, agresioni duhet të ndalet”, tha Araghchi
Ministri i Punëve të Jashtme i Iranit, Abbas Araghchi, ka paralajmëruar se pjesëmarrja e SHBA-së në sulmet e vazhdueshme të Izraelit ndaj Iranit do të ishte “shumë e pafat” dhe “jashtëzakonisht e rrezikshme për të gjithë”, raporton Anadolu.
Araghchi foli për gazetarët në Stamboll para seancës së 51-të të Këshillit të Ministrave të Jashtëm të Organizatës së Bashkëpunimit Islamik (OIC) në Stamboll.
“Diplomacia funksionoi në të kaluarën, mund të funksionojë përsëri. Por për t’u rikthyer në të, agresioni duhet të ndalet”, tha Araghchi.
Ai theksoi gatishmërinë e Iranit për negociata paqësore.
“Ne jemi absolutisht të gatshëm për një zgjidhje të negociuar, ashtu si në vitin 2015”, tha ai.
Ministri iranian akuzoi Izraelin për kundërshtimin e përpjekjeve diplomatike, duke shtuar se “Izraeli është qartë kundër diplomacisë”.
Ai përsëriti se ndalimi i armiqësive është një parakusht për çdo përparim diplomatik.
Armiqësitë shpërthyen më 13 qershor kur Izraeli nisi sulme ajrore në disa lokacione në të gjithë Iranin, duke përfshirë objektet ushtarake dhe bërthamore, duke e çuar Teheranin të nisë sulme hakmarrëse.
Që atëherë, autoritetet izraelite thanë se të paktën 25 persona janë vrarë dhe qindra të tjerë janë plagosur në sulmet me raketa iraniane, ndërkohë sipas raportimeve në mediat iraniane, të paktën 430 persona janë vrarë dhe mbi 3.500 të tjerë janë plagosur në sulmet izraelite në Iran.
