Autoritetet iraniane kanë ekzekutuar këtë mëngjes Majid Mosayebi-n, i dënuar për spiunazh në favor të shërbimit izraelit të inteligjencës Mossad, pasi ishte arrestuar pas sulmeve izraelite ndaj Iranit.
Shërbimet e sigurisë iraniane kanë arrestuar një numër shtetasish iranianë nën dyshimin se kanë bashkëpunuar me Mossadin. Disa prej tyre janë shpallur fajtorë dhe janë dënuar me vdekje me varje.
“Majid Mosayebi u var këtë mëngjes pasi kaloi të gjitha fazat e procedurës penale dhe pas konfirmimit të dënimit nga Gjykata e Lartë,” thuhet në njoftimin zyrtar të sistemit gjyqësor iranian.
Zyrtarët iranianë pohojnë se agjentët izraelitë dhe bashkëpunëtorët e tyre i kanë shkaktuar dëme të konsiderueshme instalimeve ushtarake iraniane në ditët e para të konfliktit. Grupi i infiltruar thuhet se ka përdorur raketa kundërblindazh për të shkatërruar disa qendra radari, dhe dyshohet gjithashtu se ka qenë përgjegjës për vendosjen e makinave bombë në Teheran.
