Grupi më i madh pro-izraelit në Shtetet e Bashkuara të Amerikës, AIPAC, shpenzoi 84,1 milionë dollarë në zgjedhjet për Kongresin amerikan, ndërsa 55,3 milionë dollarë u investuan në gara zgjedhore ku kandidatët e mbështetur prej tij pësuan humbje.
Sipas të dhënave të publikuara nga portali amerikan Responsible Statecraft, AIPAC i shpenzoi këto mjete përmes organizatës së tij politike, United Democracy Project (UDP), si dhe disa grupeve të tjera politike, në garat zgjedhore që tashmë kanë përfunduar.
Këtë herë, AIPAC ka shënuar rezultate dukshëm më të dobëta krahasuar me zgjedhjet e mëparshme. Në zgjedhjet e vitit 2022, pothuajse 70 për qind e fondeve të organizatës u shpenzuan në gara ku u arrit rezultati i dëshiruar.
Në zgjedhjet e vitit 2024, kjo përqindje arriti në 87 për qind, ndërsa këtë vit ka rënë në vetëm 34 për qind.
Responsible Statecraft vlerëson se këto shifra do të jenë të vështira për t’u justifikuar para donatorëve, veçanërisht pasi AIPAC vazhdimisht pretendon se mbështetja për Izraelin është e dobishme si në aspektin politik, ashtu edhe për suksesin elektoral.
Miliona dollarë të shpenzuar pa sukses në Michigan dhe Illinois
Dy garat më të kushtueshme për UDP përfunduan me humbje, pavarësisht investimit prej 37,78 milionë dollarësh.
Në Michigan, organizata shpenzoi 31,47 milionë dollarë në përpjekje për të penguar fitoren e Abdul El-Sayed në zgjedhjet brendapartiake dhe ato të përgjithshme, por pa arritur qëllimin.
Objektivi i dytë më i madh ishte Daniel Biss në distriktin e nëntë zgjedhor të Illinoisit. UDP shpenzoi 6,31 milionë dollarë për të penguar fitoren e tij ndaj Laura Fine në zgjedhjet brendapartiake, por përpjekja rezultoi e pasuksesshme.
Organizata pësoi humbje edhe në distriktin e shtatë zgjedhor të Illinoisit, ku shpenzoi 5,03 milionë dollarë, kryesisht për të mbështetur Melissa Conyears-Ervin në zgjedhjet brendapartiake.
Në Kaliforni, AIPAC investoi 4,92 milionë dollarë për të mbështetur Melissa Hernandez dhe për të zhvilluar fushatë kundër Aisha Wahab në raundin e dytë të zgjedhjeve të jashtëzakonshme, të mbajtura më 18 gusht në distriktin e 14-të zgjedhor. Edhe kjo përpjekje përfundoi pa sukses.
Ndërkohë, investimi më i suksesshëm i organizatës u regjistrua në distriktin e pestë zgjedhor të Marylandit, ku AIPAC shpenzoi 5,73 milionë dollarë për të mbështetur Adrian Boafo, i cili fitoi zgjedhjet brendapartiake të demokratëve.
Mbështetja për Izraelin dhe luftën kundër Iranit
AIPAC ishte ndër organizatat e para që përshëndetën vendimin e presidentit amerikan Donald Trump për të nisur luftën kundër Iranit më 28 shkurt.
Organizata financoi gjithashtu reklama kundër kandidatëve për Dhomën e Përfaqësuesve dhe Senatin, të cilët kishin kërkuar ndërprerjen e ndihmës amerikane për Izraelin.
Sipas vlerësimit të Responsible Statecraft, AIPAC tani mund të përballet me vështirësi në sigurimin e fondeve nga donatorët për mbështetjen e kandidatëve pro-izraelitë në zgjedhjet e vitit 2028.
Çështjet kryesore që organizata ka promovuar, përfshirë mbështetjen e pakushtëzuar të SHBA-së për Izraelin në luftërat në Gaza dhe Iran, sipas portalit, kanë rezultuar të dëmshme për republikanët, të cilët pësuan një humbje të rëndë në këto zgjedhje.
