Çmimet globale të naftës arritën të enjten në 100 dollarë për fuçi, si pasojë e përshkallëzimit të konfliktit në Lindjen e Mesme.
Kjo vlen para së gjithash për naftën e papërpunuar Brent, çmimi i së cilës kaloi pragun prej 100 dollarësh. Herën e fundit që çmimi i naftës Brent kishte kaluar këtë nivel ishte në mars të këtij viti.
Edhe çmimi i naftës së papërpunuar amerikane u rrit për të dytën ditë radhazi, duke shënuar një rritje prej më shumë se 5 për qind dhe duke arritur në afro 92 dollarë për fuçi, niveli më i lartë që nga 11 qershori.
Sipas “The Guardian”, çmimi i naftës kishte arritur kulmin prej 126 dollarësh për fuçi në muajin prill, gjatë konfliktit, por në fund të majit kishte rënë nën 100 dollarë. Në fillim të korrikut, çmimi kishte zbritur deri në 71 dollarë, mes shpresave për një armëpushim në rajon.
Çmimi filloi të rritet sërish pasi memorandumi i mirëkuptimit mes SHBA-së dhe Iranit dështoi dhe konflikti u përshkallëzua përsëri.
Rritja e re vjen pasi Huthët e Jemenit, të mbështetur nga Teherani, morën përgjegjësinë për sulmet ndaj dy cisternave saudite të naftës në Detin e Kuq, pasi kishin paralajmëruar vendosjen e një bllokade detare ndaj mbretërisë.
Kërcënimi i Huthëve ka shkaktuar shqetësim në tregjet e naftës, pasi miliona fuçi naftë kalojnë çdo ditë përmes ngushticës Bab el-Mandeb për të arritur në tregjet globale.
Rreth 12 deri në 15 për qind e tregtisë globale detare, me vlerë mbi një trilion dollarë, kalon çdo vit përmes këtyre rrugëve detare.
