Administrata Greke e Qipros së Jugut (AGQJ) ka njoftuar se do të hapë portet e saj për anijet luftarake të Indisë dhe se dy vendet do të zhvillojnë stërvitje të përbashkëta detare.
Sipas mediave greke në Qipro, Presidenti i AGQJ-së, Nikos Hristodulidis, dhe Kryeministri i Indisë, Narendra Modi, kanë nënshkruar në Pallatin Presidencial një “Deklaratë të Përbashkët Bashkëpunimi” me 10 pika.
Në nenin e 5-të të kësaj deklarate, që përfshin bashkëpunim të ndërsjellë në fushat politike, kulturore dhe ekonomike, nën titullin “Siguria, Mbrojtja dhe Menaxhimi i Krizave”, thuhet:
“Udhëheqësit diskutuan gjithashtu për zgjerimin e bashkëpunimit në fushën detare. Do të inkurajohet ankorimi më i rregullt i anijeve luftarake indiane në portet e Qipros (AGQJ), dhe do të eksplorohen së bashku mundësi të reja për stërvitje dhe trajnime të përbashkëta detare, me qëllim rritjen e ndërgjegjësimit detar dhe sigurisë rajonale.”
Pas nënshkrimit të deklaratës, mediat greke raportojnë se pritet që së shpejti anijet ushtarake indiane të fillojnë të vizitojnë portet e AGQJ-së.
Më parë, AGQJ kishte bërë të ditur se do t’i hapte portet e saj vendeve që i cilëson si “aleatë”, si SHBA, Izraeli, Gjermania, Franca dhe Egjipti, si dhe se baza detare që do të ndërtohet në Limasol do të shërbejë për këtë qëllim.
