Iniciativa, e para e këtij lloji nga qeveria amerikane, e publikuar disa javë përpara se presidenti Joe Biden të largohej nga detyra, ndjek një strategji të ngjashme të nisur në vitin 2023 për të luftuar antisemitizmin
Shtëpia e Bardhë publikoi një strategji kombëtare për të luftuar islamofobinë, duke përshkruar mbi 100 veprime që zyrtarët federalë po ndërmarrin për të adresuar urrejtjen, dhunën dhe diskriminimin ndaj komuniteteve muslimane dhe arabe në SHBA, raporton Anadolu.
Iniciativa, e para e këtij lloji nga qeveria amerikane, e publikuar disa javë përpara se presidenti Joe Biden të largohej nga detyra, ndjek një strategji të ngjashme të nisur në vitin 2023 për të luftuar antisemitizmin.
Shtëpia e Bardhë theksoi rëndësinë në rritje të planit përballë kërcënimeve në rritje, duke vënë në dukje vrasjen e bërë në tetor 2023 të Wadee Alfayoumi, një djaloshi 6-vjeçar palestinezo-amerikan në Illinois.
“Gjatë vitit të kaluar, kjo iniciativë është bërë edhe më e rëndësishme pasi kërcënimet kundër komuniteteve muslimane amerikane dhe arabe janë rritur”, thuhet në një deklaratë të Shtëpisë së Bardhë.
Katër prioritetet kryesore të strategjisë përfshijnë rritjen e ndërgjegjësimit kundër urrejtjes ndaj muslimanëve dhe arabëve, rritjen e sigurisë së tyre, trajtimin e diskriminimit sistematik dhe ndërtimin e solidaritetit ndërmjet komuniteteve për të luftuar urrejtjen.
“Muslimanët dhe arabo-amerikanët kanë ndihmuar në ndërtimin e vendit tonë që nga themelimi i tij, por ata gjithashtu kanë përjetuar në mënyrë rutinore urrejtje, diskriminim dhe paragjykim për shkak të stereotipeve të pabaza, nxitjes së frikës dhe paragjykimeve,” vuri në dukje deklarata.
Administrata detajoi disa masa, si investimet në forcimin e sigurisë së organizatave jofitimprurëse, rritjen e përpjekjeve për të siguruar qasje më të lehtë në ato fonde, korrigjimi i kufizimit diskriminues të udhëtimit, përmirësimi i qasjes në burime për raportimin e krimeve të urrejtjes.
“Kërcënimet ndaj një komuniteti duhet të trajtohen si kërcënime për të gjithë. Rritja e bashkëpunimit ndërmjet komuniteteve vazhdon të jetë një pjesë kyçe e përpjekjeve të administratës për të mbrojtur sigurinë e të gjithë amerikanëve, përfshirë përmes partneriteteve të reja që ndërtojnë solidaritet midis komuniteteve të besimeve të ndryshme“, tha Shtëpia e Bardhë.
Grupi më i madh i musliman në SHBA, Këshilli për Marrëdhëniet Amerikano-Islame (CAIR), e kritikoi planin, duke thënë: “Megjithëse ne dhe shumë muslimanë amerikanë normalisht do të mirëprisnim një strategji kombëtare për të luftuar islamofobinë, strategjia e vonuar prej kohësh e Shtëpisë së Bardhë ofron shumë pak, shumë vonë”.
“Dokumenti prej 67 faqesh parashtron disa rekomandime pozitive në lidhje me fanatizmin kundër muslimanëve, por ai është publikuar në një kohë kur nuk mund të ketë ndikim, nuk premton ndonjë ndryshim në programet federale që përjetësojnë diskriminimin kundër muslimanëve në një shkallë masive, siç është lista mbikëqyrëse federale Orwelliane, dhe nuk premton një fund për shtytësin më të rëndësishëm të fanatizmit kundër muslimanëve sot: Gjenocidin e mbështetur nga SHBA në Gaza”, thuhet në deklaratë.
Grupi gjithashtu thotë se Biden nuk mund të “pohojë në mënyrë të besueshme” se kujdeset për muslimanët ose islamofobinë, teksa mbështet shkatërrimin e xhamive nga qeveria izraelite, përdhosjen e Kur’anit, si dhe duke mundësuar krimet e luftës të Izraelit në Gaza.
