Mbrojtja ajrore e Ukrainës rrëzoi 213 nga 315 dronë të llojeve të ndryshme të lëshuar nga Rusia gjatë natës
Ukraina njoftoi se të paktën dy persona u vranë dhe 13 të tjerë u plagosën për shkak të një sulmi rus me dronë gjatë natës në qytetin jugperëndimor të Odesës dhe në kryeqytetin Kiev, transmeton Anadolu.
“Fatkeqësisht, numri i viktimave të sulmit rus është rritur në dy. Trupi i një burri të lindur në vitin 1967 u gjet nën rrënoja. Nëntë persona u plagosën, katër prej tyre janë shtruar në spital në gjendje të rëndë”, tha guvernatori i Odesës, Oleh Kiper, në Telegram.
“Ka zjarre dhe dëme në infrastrukturën civile në qytet për shkak të sulmit”, tha Kiper duke shtuar se sulmet synuan veçanërisht një spital, një stacion mjekësor emergjent dhe ndërtesa banimi.
Kryetari i Bashkisë së Kievit, Vitali Klitschko tha se katër persona u plagosën në kryeqytetin ukrainas si rezultat i sulmit ndërsa administrata ushtarake e Qytetit të Kievit në Telegram tha se shtatë nga rrethet e kryeqytetit u prekën nga sulmet.
Forcat Ajrore të Ukrainës në Telegram pretenduan se mbrojtja e tyre ajrore rrëzoi 213 nga 315 dronë të llojeve të ndryshme të lëshuar nga Rusia gjatë natës.
“Sulmet me raketa ruse dhe ‘Shahed’ i vrasin përpjekjet e SHBA-së dhe të tjerëve në mbarë botën për ta detyruar Rusinë të hyjë në paqe”, tha presidenti ukrainas, Volodymyr Zelenskyy në rrjetin social X pas sulmeve.
Zelenskyy përsëriti se “veprime konkrete” nga SHBA-ja, Evropa dhe të tjerët janë të nevojshëm në vend që të reagohet ndaj sulmeve të natës thjesht me heshtje. “Duhet të ketë presion të fortë për hir të paqes”, theksoi ai.
