UEFA është e gatshme të bllokojë kthimin e ekipeve ruse në futbollin ndërkombëtar, pasi Komiteti Olimpik Ndërkombëtar (KON) e hoqi përkohësisht pezullimin e këtij vendi nga garat globale.
FIFA ka sinjalizuar se do ta rishqyrtojë qëndrimin e saj, pasi kishte vendosur ndalesë ndaj ekipeve ruse pas pushtimit të plotë të Ukrainës katër vjet më parë. Të martën u njoftua se FIFA “do ta analizojë vendimin para se të vendosë për hapat e ardhshëm”, ndërsa qëndrimi i UEFA-s hap mundësinë për një përplasje të re me organizatën botërore të futbollit.
UEFA ende nuk është deklaruar zyrtarisht, por burime nga disa federata kombëtare thonë se nuk ka gjasa reale që ekipet ruse të pranohen sërish në futbollin evropian, e rrjedhimisht as në Kupën e Botës. Edhe pse bëhet fjalë për një turne të FIFA-s, kualifikimet evropiane organizohen nga UEFA.
Shumë nga federatat më të mëdha të Evropës Perëndimore, përfshirë ato në Angli, Gjermani dhe Francë, vazhdojnë ta kundërshtojnë ashpër kthimin e Rusisë.
UEFA, tre vjet më parë, u detyrua të tërhiqej nga planet për rikthimin e ekipeve ruse në garat e të rinjve, pas reagimeve të ashpra të të paktën një duzine anëtaresh të saj. Për këtë arsye, ajo nuk dëshiron përsëritjen e të njëjtit skenar. Presidenti i UEFA-s, Aleksander Čeferin, do të garojë për rizgjedhje vitin e ardhshëm, ndaj është pak e mundshme që ai të rrezikojë tjetërsimin e një pjese të madhe të trupit të tij elektoral.
Nga ana tjetër, FIFA është më e hapur ndaj ripranimit të Rusisë. Gianni Infantino e ka bërë të qartë se do ta mirëpriste kthimin e këtij vendi. Presidenti i FIFA-s vazhdon të jetë i afërt me Vladimir Putinin, me të cilin bashkëpunoi gjatë organizimit të Kupës së Botës 2018 në Rusi, ndërsa ndihmoi edhe në mundësimin e pjesëmarrjes së përfaqësueses ruse U-15 për meshkuj në Kupën e Botës për të rinj, që u mbajt në tetor në Azerbajxhan, shkruan Guardian.
Infantino në shkurt, për Sky News, kishte deklaruar se FIFA do ta shqyrtonte riintegrimin e ekipeve ruse. “Kjo ndalesë nuk ka arritur asgjë, vetëm ka krijuar më shumë frustrim dhe urrejtje”, kishte thënë ai atëherë.
Edhe nëse FIFA do të ndërmerrte një hap radikal dhe do t’i lejonte Rusisë të hynte në kualifikimet për Kupën e Botës përmes ndonjë konfederate tjetër – siç është rasti me Izraelin, që garon në Evropë – kjo mund të mos e zgjidhte problemin. Ekipet evropiane mund të kërcënojnë me bojkot nëse Rusia kualifikohet në Kupën e Botës.
Çështja e Rusisë mund të hapë edhe një vijë tjetër të madhe ndarjeje mes dy organizatave më të fuqishme në futbollin botëror, të cilat këtë javë tashmë janë përplasur publikisht.
Përplasja shpërtheu pasi komisioni disiplinor i FIFA-s mori një vendim të paprecedentë dhe ia hoqi pezullimin Folarin Balogunit para humbjes së SHBA-së ndaj Belgjikës në 1/8 e finales së Kupës së Botës.
UEFA e akuzoi FIFA-n se ka kaluar “vijën e kuqe”, duke cenuar integritetin e Kupës së Botës, ndërsa pala tjetër iu kundërpërgjigj me akuza për hipokrizi.
