Presidenti amerikan Trump tha për mediat se nuk dëshiron të shohë ndryshim të regjimit në Iran, duke argumentuar se tranzicioni do të “shkaktonte kaos”
Presidenti i SHBA-së, Donald Trump deklaroi se nuk është në favor të ndryshimit të regjimit në Iran, duke paralajmëruar se një ndryshim i tillë do të shkaktonte “kaos”, transmeton Anadolu.
Duke folur me gazetarët në bordin e “Air Force One” gjatë rrugës për në një samit të NATO-s në Hagë, Trump tha për mediat se nuk dëshiron të shohë ndryshim të regjimit në Iran, duke argumentuar se tranzicioni do të “shkaktonte kaos”.
Deklarata përfaqëson një ndryshim nga qëndrimi i mëparshëm i Trumpit, pasi gjatë fundjavës ai sugjeroi se ishte i hapur ndaj idesë së ndryshimit të regjimit në Iran, duke argumentuar se qeveria aktuale pengon zhvillimin e vendit.
“Nuk është politikisht korrekte të përdoret termi ‘ndryshim regjimi’, por nëse regjimi aktual iranian nuk është në gjendje ta bëjë Iranin të madh përsëri, pse mos të ketë një ndryshim regjimi??? MIGA!!! (Make Iran Great Again)”, shkroi presidenti amerikan në mediat sociale të dielën.
Zëdhënësja e Shtëpisë së Bardhë, Karoline Leavitt e kishte përforcuar këtë qëndrim, duke thënë për “Fox News” se “presidenti beson se populli iranian mund të kontrollojë fatin e vet”.
