Një përplasje e pazakontë ka shpërthyer mes kryeministrit izraelit Benjamin Netanyahu dhe presidentit amerikan Donald Trump lidhur me Iranin: SHBA-të janë alarmuar nga mundësia që Izraeli po përgatitet për një sulm të njëanshëm – pa koordinim me Uashingtonin.
Presidenti Trump, përmes një bisede telefonike me Netanyahun, e paralajmëroi qartë: “Mos e bëj!”. Në Izrael, është e qartë se bashkëpunimi me SHBA-në është i domosdoshëm, veçanërisht në fushën e mbrojtjes kundërraketore.
Trump ka pranuar publikisht se i ka kërkuar Netanyahut të mos ndërmarrë ndonjë sulm ndaj Iranit ndërsa janë në zhvillim negociatat për programin bërthamor. Televizioni izraelit Channel 12 zbuloi hollësi të këtij përshkallëzimi diplomatik të pazakontë që përfundoi me një paralajmërim të ashpër dhe publik nga presidenti amerikan.
Trump gjithashtu ka urdhëruar Pentagonin dhe ushtrinë amerikane që të ndalojnë çdo koordinim të mëtejshëm me Izraelin për ndonjë sulm të mundshëm të përbashkët ndaj objekteve bërthamore iraniane.
Duke parë rrezikun e një sulmi të njëanshëm izraelit, Trump ka iniciuar një telefonatë urgjente me Netanyahun, gjatë së cilës i ka kërkuar të përmbahet nga veprime të tilla. Izraeli është i vetëdijshëm se pa bashkëpunimin me SHBA-në, mbrojtja kundërraketore dhe siguria strategjike janë të rrezikuara.
Në fillim të javës, raportimet nga “Dnevnik” zbuluan se biseda mes dy liderëve ishte jashtëzakonisht e tensionuar. Pas telefonatës, zyra e Netanyahut publikoi një deklaratë zyrtare të vagullt, duke përmendur se të dy palët ishin të një mendjeje se Irani nuk duhet të ketë armë bërthamore.
Por, sipas burimeve ushtarake dhe diplomatike, gjatë bisedës Trump i ka bërë të qartë Netanyahut që mbështet një zgjidhje diplomatike me Iranin dhe beson në aftësinë e tij për të arritur një marrëveshje të fortë, që do të garantonte gjithashtu sigurinë e Izraelit.
Javën e kaluar, CNN raportoi se Trump beson se SHBA-të janë afër arritjes së një marrëveshjeje të re bërthamore me Iranin. Ai konfirmoi gjithashtu se i ka thënë Netanyahut se një sulm ndaj Iranit do të ishte “i papërshtatshëm dhe i padëshirueshëm”.
“Po, dua të jem i sinqertë. I thashë se tani nuk është momenti i duhur, sepse nëse arrijmë një marrëveshje të fuqishme – mund të shpëtojmë shumë jetë. Mendoj se edhe ata duan një marrëveshje, por gjithçka mund të ndryshojë me një telefonatë,” deklaroi Trump.
Sipas tij, ekipi negociator ka pasur bisedime shumë të mira me Iranin dhe në takimin e ardhshëm mund të arrihet një marrëveshje e përkohshme, e cila më pas do të hapë rrugën për negociata më të gjera dhe afatgjata.
SHBA-të janë gjithnjë e më të shqetësuara për ndonjë veprim të njëanshëm të Izraelit ndaj objekteve bërthamore iraniane, gjë që ka bërë që Trump jo vetëm ta paralajmërojë Netanyahun personalisht, por edhe të bëjë publike përmbajtjen e bisedës së tyre.
