Edhe pse pritej që përballja ndaj Serbisë të shoqërohej me një atmosferë të zjarrtë në tribuna, grupi më i njohur i tifozëve shqiptarë “Tifozat Kuq e Zi” ka vendosur të bojkotojë ndeshjen, në atë që është refuzimi i parë i pjesëmarrjes së tyre pas 21 vitesh ekzistence.
Kjo përballje me rrezik të lartë dhe me rëndësi të veçantë për kualifikimet e Kupës së Botës do të zhvillohet të shtunën mes Shqipërisë dhe Serbisë, por pa pjesëmarrjen e tifo-grupit që për dekada ka qenë simbol i mbështetjes së zjarrtë për kombëtaren.
Tifozat Kuq e Zi kanë shprehur indinjatën e tyre ndaj Federatës Shqiptare të Futbollit (FSHF), të cilën e akuzojnë për përjashtim të qëllimshëm dhe për favorizim të interesave private.
Ajo që i ka revoltuar më shumë është mënyra e shpërndarjes së biletave, të cilën e kanë cilësuar si një “mashtrim” dhe “gënjeshtër të lumtur”. Sipas tyre, sistemi i shitjes së biletave nuk ka qenë as transparent, as gjithëpërfshirës, dhe ka siguruar pjesën më të madhe të biletave për agjencitë turistike.
Ata kanë reaguar edhe ndaj çmimeve të larta të biletave, ku hyrja në stadium për këtë ndeshje kushtonte mes 150 deri në 1.000 euro.
“E paimagjinueshme është që një familje mesatare shqiptare – një prind, bashkëshortja dhe dy fëmijë – të paguajë 600 euro për të ndjekur një ndeshje, aq sa do t’i kushtonte një javë pushimesh në qershor,” thuhet në reagimin e grupit.
Ky do të jetë bojkoti i parë i Tifozëve Kuq e Zi që nga themelimi i tyre, dhe pikërisht në një ndeshje ndaj Serbisë, rivali më i madh historik për shqiptarët – gjë që e bën akoma më domethënës mungesën e tyre në tribuna. Mbetet të shihet se çfarë atmosfere do të krijohet pa praninë e tyre.
