Mediat shtetërore iraniane shfaqën të mërkurën ceremoninë mortore për fëmijët, mbetjet mortore të të cilëve u gjetën së fundmi në rrënojat e një shkolle për vajza në Minab. Shkolla ishte goditur më 28 shkurt, në ditën e parë të luftës me Iranin.
Sipas televizionit shtetëror iranian IRINN, ceremonia mortore u mbajt për 68 grupe mbetjesh mortore që u përkisnin 34 fëmijëve të vrarë në Minab, të cilët ishin varrosur më herët.
Reuters raportoi më 5 mars se një hetim i brendshëm paraprak i ushtrisë amerikane kishte treguar se forcat amerikane, me shumë gjasë, ishin përgjegjëse për sulmin vdekjeprurës në Minab, ku sipas zyrtarëve iranianë humbën jetën më shumë se 175 fëmijë dhe mësues.
Gjysmëhëna e Kuqe iraniane publikoi të mërkurën fotografi që, sipas saj, tregojnë trupat e gjetur së fundmi të “dëshmorëve” nga shkolla në Minab.
Agjencia iraniane e lajmeve Mizan dhe Student News Network gjithashtu njoftuan se fotografitë paraqesin pjesë trupore të këtyre “dëshmorëve”.
Reuters, duke iu referuar burimeve të njohura me rastin, raportoi se zyrtarët amerikanë përgjegjës për përzgjedhjen e objektivave të sulmit, me sa duket, kishin përdorur të dhëna të vjetruara të inteligjencës.
