Në Shtetet e Bashkuara të Amerikës, një shtetas amerikan është zbuluar ndërsa përpiqej t’i dorëzonte informacione të klasifikuara shërbimit sekret gjerman, BND.
Mediat gjermane raportojnë se bëhej fjalë për një ekspert të sigurisë kibernetike që punonte për shërbimin ushtarak të inteligjencës së SHBA-së. Fillimisht, ai kishte ofruar shërbimet e tij për Shërbimin Federal të Inteligjencës Gjermane (BND). Megjithatë, në vend që ta pranonin ofertën, autoritetet gjermane e kishin njoftuar partnerët e tyre amerikanë për incidentin.
“Zakonisht, janë shërbimet sekrete gjermane që përfitojnë nga informacionet e ardhura nga SHBA-të. Por kësaj radhe, situata ishte qartësisht e kundërta”, thuhet në raportimet mediatike.
Amerikani, i cili kishte nivelin më të lartë të aksesit në informacione të klasifikuara, kishte justifikuar veprimet e tij duke thënë se nuk i ndante vlerat e administratës së Donald Trumpit.
Sipas njoftimit të Departamentit Amerikan të Drejtësisë, 28-vjeçari u arrestua në momentin kur po përpiqej t’i dorëzonte dokumente të klasifikuara një agjenti të fshehtë të FBI-së, me të cilin kishte mbajtur kontakte për një kohë të caktuar.
