Samiti i NATO-s do të fillojë sot në Hagë, me disa çështje për të diskutuar nga udhëheqësit botërorë.
Dhe Mark Rutte, shefi i aleancës ushtarake, ka folur përpara fillimit zyrtar të takimit.
Ai thotë se aleatët evropianë nuk duhet të shqetësohen për angazhimin e Shteteve të Bashkuara ndaj NATO-s, shkruajnë mediat e huaja, përcjell Telegrafi.
Takimi dy-ditor synon t’i sinjalizojë Vladimir Putin se NATO është e bashkuar, pavarësisht kritikave të mëparshme të presidentit amerikan ndaj aleancës, dhe e vendosur të zgjerojë dhe përmirësojë mbrojtjen e saj për të penguar çdo sulm nga Moska.
“Ekziston një angazhim i plotë nga presidenti i SHBA-së dhe udhëheqja e lartë e SHBA-së ndaj NATO-s”, ka thënë Rutte në një forum publik para hapjes zyrtare të samitit, duke shtuar, megjithatë, se një mbështetje e tillë erdhi me një pritje që vendet evropiane dhe Kanadaja të shpenzojnë më shumë për mbrojtje.
Samiti dhe deklarata e tij përfundimtare do të jenë të shkurtra dhe të përqendruara në ndjekjen e thirrjes së Trump për të shpenzuar 5% të PBB-së për mbrojtje – një kërcim i madh nga objektivi aktual prej 2%.
Kjo duhet të arrihet si duke shpenzuar më shumë për artikuj ushtarakë, ashtu edhe duke përfshirë shpenzime më të gjera që lidhen me sigurinë në objektivin e ri.
Duke u dukur i qetë para mbërritjes së pritur të Trump më vonë sot, Rutte e përshkroi çështjen e shpenzimeve si “këtë guralec të madh në këpucë, këtë irritues të madh, që është se ne nuk po shpenzojmë mjaftueshëm si evropianë dhe kanadezë, dhe ata duan që ne të barazohemi me atë që po shpenzon SHBA-ja”.Ndërsa i pyetur për mundësinë e përfundimit të luftës trevjeçare në Ukrainë, Rutte tha: “Nuk mund të parashikoj se kur do të ndodhë”.
