– “Të huajt që glorifikojnë dhunën dhe urrejtjen nuk janë vizitorë të mirëpritur në vendin tonë”, tha Zëvendëssekretari amerikan i Shtetit
SHBA-ja njoftoi sot revokimin e vizave të grupit britanik të muzikës punk “Bob Vylan” pas thirrjeve “Vdekje IDF-së” gjatë performancës së tyre në Festivalin Glastonbury, transmeton Anadolu.
“Departamenti i Shtetit ka revokuar vizat amerikane për anëtarët e grupit Bob Vylan pas tiradës së tyre të urrejtjes në Glastonbury, duke përfshirë edhe udhëheqjen e turmës në thirrje vdekjeje”, shkroi Zëvendëssekretari i Shtetit Christopher Landau në X.
“Të huajt që glorifikojnë dhunën dhe urrejtjen nuk janë vizitorë të mirëpritur në vendin tonë”, shtoi ai.
Ky veprim vjen pasi grupi këndoi “Vdekje IDF-së” gjatë shfaqjes së tyre të së shtunës në Glastonbury, festivali më i madh i muzikës në Britani, duke iu referuar Forcave të Mbrojtjes të Izraelit.
Ambasada izraelite në Londër i dënoi komentet si “retorikë nxitëse dhe të urrejtjes”, ndërsa kryeministri i Mbretërisë së Bashkuar Keir Starmer e quajti thirrjen “gjuhë urrejtjeje të tmerrshme”.
Ushtria izraelite ka kryer një ofensivë brutale në Rripin e Gazës që nga 7 tetori 2023, duke vrarë deri më tani më shumë se 56.500 palestinezë, shumica prej tyre gra dhe fëmijë.
Gjykata Ndërkombëtare Penale lëshoi urdhëra arresti nëntorin e kaluar për kryeministrin izraelit Benjamin Netanyahu dhe ish-ministrin e tij të Mbrojtjes Yoav Gallant për krime lufte dhe krime kundër njerëzimit në Gaza.
Izraeli gjithashtu përballet me një padi për gjenocid në Gjykatën Ndërkombëtare të Drejtësisë për luftën e tij në enklavën palestineze.
