Në kujtimet e saj të reja, senatorja amerikane Lisa Murkowski përshkruan marrëdhënien e saj të ndërlikuar, por produktive me Donald Trumpin – për të cilin hapur pranon se kurrë nuk ka votuar.
“Kurrë nuk i kam lejuar vetes që Donald Trump të më trondisë. Nuk kam votuar kurrë për të dhe kam injoruar kërcënimet e tij, duke votuar kundër tij në momentet kyçe,” shkruan senatorja e moderuar republikane në librin e saj “Larg nga shtëpia: Një senatore nga Alaska përballë klimës ekstreme të Washingtonit, D.C.”
Murkowski thekson se zgjedhja e Trumpit në vitin 2016 “përshpejtoi rënien historike të institucioneve të drejtësisë amerikane” dhe se suksesi i tij politik është më shumë çështje fati sesa aftësie.
“Trump dëshiron të shihet si unik dhe veçanërisht i aftë. Ai duket se ka një nevojë të thellë psikologjike për këtë lloj miratimi. Në fakt, ai ka të kundërtat e këtyre cilësive. Në marrëdhënien time me të si president, ishte e qartë se ai nuk ishte në gjendje të planifikonte ngritjen e tij, apo të organizonte transformimin e Gjykatës së Lartë. Ai nuk është aq i zgjuar,” shkruan ajo.
Senatorja përshkruan gjithashtu takimin e saj të parë me Trumpin në Shtëpinë e Bardhë, i cili sipas saj përfundoi me një koment të çuditshëm:
“Ke flokë të bukur,” i kishte thënë Trump.
Në një intervistë më herët gjatë ditës për podcastin “GD Politics”, Murkowski la të kuptohet se mund të kandidojë si e pavarur ose të bashkohet me grupin demokrat në Senat. Megjithatë, në një deklaratë për Tom Llamas të NBC-së, ajo sqaroi se për momentin nuk mendon të largohet nga Partia Republikane.
