Një anketë e realizuar në Izrael tregon se 73% e të anketuarve mbështesin sulmet kundër Iranit.
Përplasjet mes Iranit dhe Izraelit kanë hyrë në ditën e gjashtë.
Ndërkohë që tensionet mes dy vendeve vazhdojnë, Instituti i Sigurisë Kombëtare pranë Universitetit të Tel Avivit, përmes qendrës kërkimore iPanel, realizoi më 15–16 qershor një anketë me rezultate domethënëse.
SULMET NDAJ IRANIT MBËSHTETEN NGA SHUMICA
Në anketë u pyetën 800 qytetarë hebrenj dhe 151 qytetarë arabë të Izraelit lidhur me qëndrimet e tyre për sulmet e Izraelit ndaj Iranit dhe Gazës.
73% e pjesëmarrësve thanë se i mbështesin sulmet ndaj Iranit, ndërsa vetëm 18% janë kundër tyre.
Pjesa më e madhe e të anketuarve theksuan se arsyeja kryesore për sulmet ndaj Iranit janë shqetësimet për sigurinë.
QËNDRIMET NDAJ KAPACITETIT BËRTHAMOR TË IRANIT
Rreth 70% e të anketuarve u shprehën se janë të shqetësuar në një nivel të lartë apo të pjesshëm për përshkallëzimin e konfliktit me Iranin. Po ashtu, 61% besojnë se nuk mjafton vetëm eliminimi i kërcënimit bërthamor, por duhet rrëzuar edhe regjimi në Iran.
Nga ana tjetër, 28% mendojnë se është e mjaftueshme vetëm zhdukja e rrezikut bërthamor.
Sa i përket vlerësimit të ndikimit të sulmeve mbi kapacitetin bërthamor të Iranit: 49.5% besojnë se kërcënimi është zbutur ndjeshëm pas sulmeve, ndërsa 27.5% besojnë të kundërtën. 6% e pjesëmarrësve mendojnë se kërcënimi nuk do të zhduket kurrë.
A KA QEVERIA IZRAELITE NJË STRATEGJI TË QARTË NDAJ IRANIT?
Në lidhje me pyetjen nëse qeveria izraelite ka një strategji të qartë ndaj Iranit, pjesëmarrësit janë të ndarë.
47% besojnë se nuk ka një plan të qartë, ndërsa 41% mendojnë se ekziston një strategji e përcaktuar.
60% E QYTETARËVE DUAN QË LUFTA NË GAZË TË PËRFUNDOJË
Një tjetër gjetje e rëndësishme e anketës ka të bëjë me luftën në Rripin e Gazës, e cila ka zgjatur me muaj.
60.5% e të anketuarve mendojnë se lufta në Gaza duhet të përfundojë.
Megjithatë, opinioni publik beson se lufta nuk do të përfundojë së shpejti.
Shumica e pjesëmarrësve mendojnë se përplasjet do të zgjasin të paktën edhe një muaj dhe se fronti i brendshëm mund të përballojë pasojat e saj vetëm edhe për rreth tre muaj të tjerë.
