Prej më shumë se tre dekadash, kryeministri izraelit Benjamin Netanyahu përsërit të njëjtin mesazh të njohur: Irani është një hap larg zhvillimit të armës bërthamore.
Që nga viti 1992, kur Netanyahu foli për herë të parë në Knesset si deputet, ai vazhdimisht ka pohuar se Teherani është vetëm disa vite larg nga sigurimi i bombës bërthamore.
“Brenda tre deri në pesë vjet, mund të supozojmë se Irani do të bëhet autonom në aftësinë e tij për të zhvilluar dhe prodhuar një bombë bërthamore”, kishte deklaruar atëherë.
Këtë parashikim e përsëriti edhe në librin e tij të vitit 1995 “Lufta kundër terrorizmit”.
Ndjenja e urgjencës dhe kërcënimit të menjëhershëm ka përcaktuar vazhdimisht komunikimin e Netanyahut me zyrtarët amerikanë. Në vitin 2002, ai foli para një komisioni të Kongresit amerikan duke mbështetur pushtimin e Irakut dhe duke sugjeruar se si Iraku ashtu edhe Irani po garojnë për armë bërthamore. Pasoi pushtimi amerikan i Irakut – por armë të shkatërrimit në masë nuk u gjetën kurrë.
Në vitin 2009, një depeshë diplomatike e Departamentit të Shtetit të SHBA, e publikuar nga WikiLeaks, zbuloi se Netanyahu u kishte thënë anëtarëve të Kongresit se Irani ishte vetëm një apo dy vjet larg nga kapaciteti bërthamor.
Tre vite më vonë, në Asamblenë e Përgjithshme të OKB-së, Netanyahu u bë lajm botëror kur tregoi një karikaturë të një bombe për të ilustruar pretendimin se Irani është më afër se kurrë pragut bërthamor.
“Deri në pranverë, më së voni në verë… ata do të përfundojnë pasurimin në nivel të ndërmjetëm dhe do të kalojnë në fazën përfundimtare”, tha ai në vitin 2012.
Tani, më shumë se 30 vjet pas paralajmërimit të tij të parë, Izraeli ka kryer sulme ndaj objektivave iraniane, ndërsa Netanyahu vazhdon të insistojë se kërcënimi mbetet i menjëhershëm.
“Nëse nuk ndalet, Irani mund të prodhojë armë bërthamore për një kohë shumë të shkurtër,” ka deklaruar së fundmi, duke theksuar se afati mund të jetë çështje muajsh, madje edhe javësh.
Këto pretendime vazhdojnë pavarësisht deklaratave të fundit të drejtorit të Shërbimit Kombëtar të Zbulimit të SHBA-së, i cili theksoi se Irani nuk është duke ndërtuar armë bërthamore.
Për Netanyahun, mesazhi pothuajse nuk ka ndryshuar për dekada – një paralajmërim që i tejkalon si vlerësimet e shërbimeve të inteligjencës, ashtu edhe zhvillimet diplomatike.
