Presidenti i Turqisë, Recep Tayyip Erdoğan, dhe Presidenti i Azerbajxhanit, Ilham Aliyev, pas pjesëmarrjes në ceremoninë e dorëzimit të çelësave dhe shortit për banesën e 250 mijtë për të prekurit nga fatkeqësitë, zhvilluar në Lagjen Azerbajxhan të qytetit Kahramanmaraş, vizituan një familje të prekur nga tërmeti.
Ceremoni me temën “Së bashku drejt së ardhmes së fortë”
Në këtë ceremoni, të zhvilluar me temën “Së bashku drejt së ardhmes së fortë”, morën pjesë edhe Ministri i Mjedisit, Urbanizimit dhe Ndryshimeve Klimatike, Murat Kurum, si dhe liderët e dy shteteve vëllazërore.
Pas fjalimit të ministrit Kurum, fjalën e mori Presidenti i Azerbajxhanit Ilham Aliyev, i cili u pasua nga Presidenti Erdoğan.
Vizitë tek një familje e prekur nga tërmeti
Pas ceremonisë, dy presidentët vizituan një familje që kishte humbur banesën në tërmetin shkatërrues të 6 shkurtit 2023, i cili preku 11 provinca dhe shkaktoi dëme të mëdha.
Dorëzohen çelësat e 49 mijë e 56 njësive banimi
Në ceremoninë e organizuar në Lagjen Azerbajxhan, ku ndodhen banesat e ndërtuara në bashkëpunim mes Agjencisë së Banesave Sociale të Turqisë (TOKİ) dhe qeverisë së Azerbajxhanit, u dorëzuan çelësat për 49.056 njësi banimi përfituesve të tyre.
Ndërkohë që një pjesë e banesave të reja rezistente ndaj tërmeteve tashmë është përfunduar, ndërtimi i pjesës tjetër vazhdon me ritme të shpejta, duke përfshirë edhe hapësira sociale të përshtatura me kushtet e jetesës së rajonit.
