– Një i dyshuar 15-vjeçar ndodhet në paraburgim para gjykimit, nën akuza që përfshijnë përgatitjen e një akti terrorist
Policia gjermane ka parandaluar një sulm të dyshuar zjarrvënieje nga neo-nazistët ndaj një strehimoreje për refugjatë në veri të vendit, transmeton Anadolu.
Duke cituar autoritetet, transmetuesi publik NDR raportoi se një i dyshuar 15-vjeçar ndodhet në paraburgim para gjykimit, nën akuza që përfshijnë përgatitjen e një akti terrorist.
Prokuroria e Lueneburgut konfirmoi se policia kishte kontrolluar banesat e dy të dyshuarve, të cilët ishin nën hetim për komplot të dyshuar për kryerjen e zjarrvënies.
Policia e ndaloi adoleshentin pasi dëshmitarët raportuan se e kishin parë duke ecur nëpër një qytet me një bidon benzine.
Hetuesit zbuluan se incidenti përkonte me datën e përmendur në bisedat online si koha e planifikuar për një sulm me zjarrvënie ndaj një strehimoreje për refugjatë në Winsen, në shtetin verior të Saksonisë së Ulët.
Në biseda, sipas raportimeve, neo-nazistë të rinj diskutonin planet për të sulmuar strehimoren natën e së premtes.
Sot, Prokuroria e Flensburgut tha se 15-vjeçari vazhdon të qëndrojë në paraburgim.
Përveç komplotit të dyshuar për zjarrvënie, hetuesit e akuzuan adoleshentin për përgatitjen e një akti të rëndë terrorist dhe shprehën shqetësimin se ai mund të kryente vepra të ngjashme nëse lirohej.
