Partia opozitare qipriote Akel ka shprehur shqetësimin për atë që e cilëson si blerje masive të pasurive të paluajtshme në Qipro nga qytetarë jashtë BE-së, veçanërisht nga Izraeli.
Sipas njoftimit të partisë, bëhet fjalë për “blerje të synuara” të tokave në Larnaka dhe Limassol, ku po ndërtohen komunitete të mbyllura vetëm për izraelitët. Akel ka propozuar gjithashtu një projektligj për të kufizuar dhënien e të ashtuquajturave “viza të arta”.
Kjo është hera e parë që një parti politike e trajton seriozisht këtë çështje, duke theksuar transaksionet e tokës që përfshijnë shtetas izraelitë.
“Duke pasur parasysh përmasën e vogël të Qipros dhe pozicionin e saj në një rajon të trazuar, ne do të vazhdojmë të theksojmë nevojën për veprim. Është koha që edhe qeveria të lëvizë,” tha udhëheqësi i Akel, Stefanos Stefanou, për radion CyBC.
Ai shtoi se shumë vende të mëdha si Spanja, Italia apo Gjermania kanë vendosur kufizime për shitjen e pasurive të paluajtshme për shtetasit e vendeve të treta, si një mënyrë për të mbrojtur tokën kombëtare dhe për të kontrolluar rritjen e çmimeve të pasurive.
Akel ka paraqitur në parlament dy projektligje që synojnë të kufizojnë dhe verifikojnë procesin e dhënies së “vizave të arta”, të cilat jepen për investime mbi 300.000 euro në pasuri ose kompani.
Stefanou ka përmendur se këto blerje shpesh ndodhin në zona të ndjeshme, pranë infrastrukturës së rëndësishme të shtetit, si për shembull pranë objekteve ushtarake të Gardës Kombëtare.
Në një intervistë për CyBC, ai u fokusua veçanërisht në shtetasit izraelitë, duke theksuar se në Limassol dhe Larnaka po krijohen zona të mbyllura, ku ndërtohen shkolla “cioniste” dhe sinagoga, të aksesueshme vetëm nga izraelitët. Ai paralajmëroi se disa media izraelite po e përshkruajnë Qipron si një “oborr të pasmë” të Izraelit.
“Popullsia vendase është e vetëdijshme për këtë. Nëse shkoni në Larnaka ose Limassol, banorët do t’ju tregojnë për zonat ku kjo ndodh, por autoritetet po e injorojnë,” tha Stefanou.
Në kongresin e fundit të partisë, ai u bëri thirrje autoriteteve të mbrojnë Qipron dhe të sigurojnë që ajo t’u përkasë përjetësisht qipriotëve.
Sipas statistikave, në Larnaka izraelitët janë blerësit e katërt më të shpeshtë të pasurive, me 1.406 blerje (481 me certifikata pronësie), ndërsa në Limassol kanë blerë 1.154 prona (511 me certifikata). Në Pafos, po ashtu janë në vendin e katërt me 1.291 blerje, pas britanikëve dhe rusëve.
Një ekspert i tregut të pasurive për Cyprus Mail tha se izraelitët preferojnë të blejnë toka të mëdha për ndërtimin e resorteve dhe komuniteteve të mbyllura, sidomos në zonat si Pyle, Ormideia dhe më pak në Pervolia.
