Palestinezët në veriun e Gazës raportuan një nga netët më të rënda të bombardimeve izraelite në javët e fundit, pasi ushtria të hënën lëshoi urdhra për një evakuim masiv.
Dita pas thirrjes së presidentit amerikan Donald Trump për të përfunduar luftën 20-mujore, pritej që në Shtëpinë e Bardhë të shfaqej një person me besim të kryeministrit Benjamin Netanyahu për të diskutuar mbi armëpushimin në Gaza, situatën me Iranin dhe mundësitë për marrëveshje diplomatike më të gjera rajonale, raporton Reuters.
Por në Gaza nuk pati asnjë shenjë të zbutjes së granatimeve mbi civilët.
“Shpërthimet nuk pushuan kurrë; bombardonin shkolla e shtëpi. Na dukej sikur ishin tërmete të fuqishëm. Në lajme dëgjojmë se armëpushimi është pranë, por në rrugë shohim vdekjen dhe dëgjojmë shpërthimet,” tha Salah, 60 vjeç, baba i pesë fëmijëve nga qyteti i Gazës.
Tanket izraelite hynë në zonat lindore të periferisë Zeitoun në Gaza dhe granatuan disa pika në veri, ndërsa avionët bombarduan të paktën katër shkolla pasi urdhëruan qindra familje që kishin gjetur strehë brenda të largoheshin, thanë banorët.
Të paktën 25 persona u vranë në sulmet izraelite të hënën, njoftuan autoritetet shëndetësore, përfshirë 10 viktima në Zeitoun.
Bombardimet e ashpra pasuan urdhërimet e reja për evakuimin e zonave të mëdha në veri, ku forcat izraelite kishin vepruar më parë duke shkaktuar shkatërrim të gjerë. Ushtria i udhëzoi banorët të largoheshin drejt jugut, duke thënë se planifikon të luftojë militantët e Hamasit në veri të Gazës, përfshirë edhe qytetin e Gazës.
Më vonë të hënën, zyrtarët shëndetësorë në spitalin Nasser në Khan Younis njoftuan se të paktën 13 persona u vranë në jugperëndim të qytetit të Gazës, duke çuar numrin e të vrarëve në të paktën 38.
Mjekët thanë se shumica e viktimave u goditën nga armët e zjarrit, por banorët raportuan edhe sulme ajrore.
Dita pas thirrjes së Trump për “arritjen e një marrëveshjeje në Gaza dhe kthimin e të mbijetuarve”, ministri izraelit për çështjet strategjike, Ron Dermer – përfaqësues i besuar i Netanyahu—pritej të hënën në Shtëpinë e Bardhë për bisedime rreth Iranit dhe Gazës, sipas një zyrtari izraelit.
Në Izrael pritet që Kabineti i Sigurisë së Netanyahu të mblidhet për të diskutuar hapat e ardhshëm në Gaza.
Të premten, komandanti ushtarak izraelit tha se operacioni aktual tokësor po afrohet në realizimin e objektivave, dhe të dielën Netanyahu deklaroi se janë hapur mundësi të reja për lirimin e të mbijetuarve, të cilët besohet se janë ende 20 në jetë.
Burime palestineze dhe egjiptiane të njohura me përpjekjet e fundit për armëpushim thanë se ndërmjetësit Katari dhe Egjipti kanë intensifikuar kontaktet me të dyja palët e përfshira në konflikt, por ende nuk është caktuar data për raundin e ri të negociatave për armëpushim.
