Kryeministri i Hungarisë, Viktor Orban, sot i bëri thirrje Bashkimit Evropian (BE) që të fillojë negociatat me Rusinë për përfundimin e luftës në Ukrainë, duke paralajmëruar se përndryshe do të bllokojë samitin e BE-së.
Në një letër drejtuar presidentit të Këshillit Evropian, António Costa, Orban shprehu bindjen se BE duhet të nisë bisedime të drejtpërdrejta me Rusinë për një armëpushim dhe për një paqe të qëndrueshme në Ukrainë.
Samiti i nesërm në Londër, i organizuar nga kryeministri britanik Keir Starmer, do të jetë një provë e unitetit të brishtë të liderëve të BE-së – ose Orban mund të thellojë ndarjet e brendshme pikërisht në një moment kur Ukraina po përballet me një pasiguri gjithnjë e më të madhe në fushën e betejës.
Përveç kësaj, krerët e shteteve dhe qeverive të 27 vendeve anëtare të BE-së pritet të mblidhen në Bruksel të enjten, për të diskutuar forcimin e mbrojtjes evropiane dhe për të arritur një marrëveshje mbi një paketë të re të ndihmës ushtarake për Ukrainën.
