Steve Bannon, podkaster i djathtë dhe një nga aleatët më të afërt të ish-presidentit amerikan Donald Trump, ka deklaruar për Washington Post se në Shtëpinë e Bardhë ka ndodhur një përleshje fizike në të cilën ka qenë i përfshirë miliarderi Elon Musk.
Artikulli përshkruan periudhën kur Musk ishte i përfshirë në punën e administratës Trump, dhe përplasjet e tij me anëtarë të rëndësishëm të kabinetit. Ndër pjesët më të habitshme është ajo ku thuhet se Musk është rrahur me ministrin amerikan të financave, Scott Bessent.
Sipas Bannon-it, konflikti shpërtheu pasi Trump mbështeti një kandidat për pozicionin e Komisionerit të Shërbimit të Taksave (IRS) që ishte propozuar nga Bessent. Gjatë daljes nga Zyra Ovale, ata shkëmbyen fyerje dhe Bessent e quajti Muskun “mashtrues”.
Pas kësaj, Musk e goditi me shpatull në brinjë, ndërsa Bessent iu kundërpërgjigj me një goditje në kokë. Një përplasje më e madhe u shmang pasi personat e pranishëm ndërhynë dhe i ndanë.
Sipas Bannon-it, Trump u shpreh më pas se incidenti kishte kaluar çdo kufi, duke e konsideruar ngjarjen si të papranueshme.
Megjithatë, duhet theksuar se Steve Bannon është i njohur për teoritë e konspiracionit dhe përhapjen e lajmeve të rreme. Ky incident nuk është konfirmuar nga asnjë burim zyrtar në Shtëpinë e Bardhë, dhe as vetë Musk apo Bessent nuk kanë reaguar.
Kujtojmë se Musk dikur konsiderohej një aleat i afërt i Trump, por mosmarrëveshjet mbi reforma të rëndësishme fiskale dhe çështje të tjera çuan në një ndarje të tensionuar mes tyre, e cila më pas vazhdoi edhe në rrjete sociale.
