Ministri izraelit i Financave, Bezalel Smotrich, një politikan i ekstremit të djathtë, bëri thirrje të dielën për “hapjen e dyerve të ferrit” në Rripin e Gazës, pas vendimit të qeverisë për të ndaluar ndihmën humanitare për enklavën palestineze të rrethuar.
Qeveria izraelite ndaloi të dielën hyrjen e ndihmave humanitare në zonën e prekur nga lufta, vetëm disa orë pas përfundimit të fazës së parë të armëpushimit dhe marrëveshjes për shkëmbimin e të burgosurve.
“Vendimi që morëm mbrëmë për të ndaluar plotësisht ndihmën humanitare për Gazën derisa Hamasi të shkatërrohet ose të dorëzohet plotësisht dhe të gjithë pengjet tanë të kthehen është një hap i rëndësishëm në drejtimin e duhur”, deklaroi Smotrich, kreu i Partisë së Sionizmit Fetar.
Duke e përshkruar këtë lëvizje si “pragun e dyerve të ferrit”, ai shtoi: “Tani duhet t’i hapim këto dyer sa më shpejt dhe sa më ashpër ndaj armikut mizor, deri në fitoren absolute”.
Faza e parë gjashtëjavore e marrëveshjes së armëpushimit, e cila hyri në fuqi më 19 janar, përfundoi zyrtarisht të shtunën në mesnatë. Megjithatë, Izraeli nuk pranoi të kalojë në fazën e dytë të marrëveshjes për t’i dhënë fund luftës në Gaza.
Kryeministri izraelit Benjamin Netanyahu u përpoq të zgjasë fazën fillestare të shkëmbimit për të siguruar lirimin e sa më shumë pengjeve izraelite, pa ofruar asgjë në këmbim apo përmbushur detyrimet ushtarake dhe humanitare të marrëveshjes.
Hamasi refuzoi të vazhdonte nën këto kushte, duke insistuar që Izraeli të respektonte kushtet e armëpushimit dhe të fillonte menjëherë negociatat për fazën e dytë, e cila përfshin tërheqjen e plotë të Izraelit nga Gaza dhe përfundimin e luftës.
Marrëveshja e armëpushimit ndaloi luftën izraelite kundër Gazës, e cila filloi më 7 tetor 2023 dhe që nga ajo kohë ka shkaktuar mbi 48,380 viktima, kryesisht gra dhe fëmijë, duke lënë enklavën në gërmadha.
